ലണ്ടന്‍: എടിപി ടൂര്‍ ടെന്നീസ് കിരീടം നൊവോക് ദ്യോക്കോവിച്ചിന്. ഫൈനലില്‍ റോജര്‍ ഫെഡററെ ദ്യക്കോവിച്ച് നേരിട്ടുള്ള സെറ്റുകള്‍ക്ക് പരാജയപ്പെടുത്തി. സ്‌കോര്‍ 6-3, 6-4 ദ്യോക്കോവിച്ചിന്റെ ഈ വര്‍ഷത്തെ പതിനൊന്നാം കിരീടമാണിത്.
ഗ്രൂപ്പ് ഘട്ടത്തിലെ വിജയം ഫെഡറര്‍ക്ക് ആവര്‍ത്തിക്കാനാകാതെ പോയപ്പോള്‍ എ ടി പി ടൂര്‍ കിരീടം തുടര്‍ച്ചയായ നാലാം തവണയും ദ്യോക്കോവിച്ചിനൊപ്പം നിന്നു. സെമിഫൈനലില്‍ സ്പാനിഷ് താരവും മുന്‍ ലോക ഒന്നാം നമ്പരായ റാഫേല്‍ നദാലിനെ നേരിട്ടുള്ള സെറ്റുകള്‍ക്ക് തോല്‍പ്പിച്ചാണ് ദ്യോക്കോവിച്ച് ഫൈനലിലെത്തിയത്.
തുടക്കത്തില്‍ ഫെഡറര്‍ നേരിയ പ്രതീക്ഷ വച്ചെങ്കിലും മത്സരം പുരോഗമിക്കവേ കടിഞ്ഞാണ്‍ ദ്യോക്കോവിച്ച് പിടിച്ചെടുത്തു. ആദ്യ സെറ്റ് 63ന് ദ്യോക്കോവിച്ചിന് സ്വന്തമായി. രണ്ടാ സെറ്റിലും ഫെഡററുടെ ചെറുത്ത് നില്‍പ്പുകള്‍ക്ക് അധികം ആയുസുണ്ടായില്ല. ബ്രേക്ക് പോയിന്റുകള്‍ നഷ്ടപ്പെടുത്തിയ ഫെഡറര്‍ 64ന് സെറ്റും മത്സരവും ദ്യോക്കോവിച്ചിന് അടിയറ വച്ചു. എ ടി പി ടൂര്‍ണമെന്റിന്റെ 46 വര്‍ഷത്തെ ചരിത്രത്തിലാദ്യമായാണ് ഒരു താരം തുടര്‍ച്ചയായ നാല് തവണ കിരീടം ചൂടുന്നത്.
