കൊച്ചി: നവംബര്‍ 26 അന്താരാഷ്ട്ര സുസ്ഥിര ഗതാഗത ദിനം ആചരിക്കുന്നതിന്റെ ഭാഗമായി സുസ്ഥിര ഗതാഗതം പ്രോത്സാഹിപ്പിക്കുന്നതിന് ഒരുങ്ങുകയാണ് കൊച്ചി മെട്രോ റെയില്‍ ലിമിറ്റഡ്. സെല്‍ഫി മത്സരം, ലക്കി ഡ്രോ, ക്വിസ് മത്സരങ്ങള്‍ തുടങ്ങി യാത്രക്കാര്‍ക്കും പൊതുജനങ്ങള്‍ക്കുമായി വിവിധ മത്സരങ്ങള്‍ നടത്താന്‍ തീരുമാനിച്ചിരിക്കുന്നു.
കൂടാതെ ഇലക്ട്രിക് വാഹനമുള്ളവരാണ് നിങ്ങളെങ്കില്‍ കൊച്ചി മെട്രോ ഒരുക്കുന്ന ലക്കി ഡ്രോയില്‍ നിങ്ങളാകാം വിജയി. നറുക്കെടുപ്പില്‍ പങ്കെടുക്കാന്‍ നിങ്ങളുടെ പേരും മൊബൈല്‍ നമ്പറും ഇലക്ട്രിക് വാഹനത്തിന്റെ രജിസ്‌ട്രേഷന്‍ നമ്പറും മെട്രോ സ്റ്റേഷനുകളിലെ ടിക്കറ്റ് കൌണ്ടറില്‍ നിന്ന് ലഭിക്കുന്ന ഫോമില്‍ പൂരിപ്പിച്ച് അവിടെ സ്ഥാപിച്ചിരിക്കുന്ന ലക്കി ഡ്രോ ബോക്‌സുകളില്‍ നിക്ഷേിക്കുക. നറുക്കെടുപ്പില്‍ വിജയിക്കുന്ന മൂന്ന് ഭാഗ്യശാലികള്‍ക്ക് ആകര്‍ഷകമായ സമ്മാനങ്ങള്‍ ലഭിക്കും.
അന്താരാഷ്ട്ര സുസ്ഥിര ഗതാഗത ദിനമായ ഞായറാഴ്ച്ച കൊച്ചി മെട്രോയില്‍ യാത്ര ചെയ്യുന്നവര്‍ക്കും കൈനിറയെ സമ്മാനങ്ങള്‍ നേടാന്‍ അവസരമുണ്ട്. കൊച്ചി മെട്രോയില്‍ സൈക്കിളുമായി യാത്ര ചെയ്യുന്ന നിങ്ങളുടെ ചിത്രം കെഎംആര്‍എല്ലിന്റെ വെബ്‌സൈറ്റ്, സോഷ്യല്‍ മീഡിയ പേജുകള്‍ എന്നിവയില്‍ നല്‍കിയിരിക്കുന്ന ക്യൂ ആര്‍ കോഡ് സ്‌കാന്‍ ചെയ്ത് പോസ്റ്റ് ചെയ്യുന്നത് വഴി സെല്‍ഫി മത്സരത്തില്‍ പങ്കെടുക്കാം. കൊച്ചി മെട്രോയും എഥര്‍ ഓട്ടോസ്റ്റാര്‍ക്ക് എനര്‍ജിയുമായി ചേര്‍ന്ന് നടത്തുന്ന ക്വിസ് മത്സരത്തില്‍ പങ്കെടുത്ത് സമ്മാനങ്ങള്‍ നേടാം.
