ചാമ്പ്യന്‍സ് ലീഗില്‍ യുവന്റസിനെയും പി.എസ്.ജിയേയും തോല്‍പ്പിക്കാന്‍ കഴിയുമെങ്കില്‍ ബാഴ്സലോണയെയും തറ പറ്റിക്കാന്‍ മാഞ്ചസ്റ്റര്‍ യുണൈറ്റഡിന് സാധിക്കുമെന്ന് ടീം പരിശീലകന്‍ ഒലെ സോള്‍ഷ്യര്‍. ബാഴ്സലോണക്കെതിരായ ഒന്നാം പാദ മത്സരത്തില്‍ ഒരു ഗോളിന് സ്വന്തം ഗ്രൗണ്ടില്‍ തോറ്റതിന് പിന്നാലെയാണ് മാഞ്ചസ്റ്റര്‍ യുണൈറ്റഡ് പരിശീലകന്റെ പ്രതികരണം.
പ്രീ ക്വാര്‍ട്ടര്‍ ഫൈനലില്‍ മത്സരത്തില്‍ ആദ്യ പാദത്തില്‍ ഓള്‍ഡ് ട്രാഫോര്‍ഡില്‍ രണ്ടു ഗോളിന് തോറ്റതിന് ശേഷം മാഞ്ചസ്റ്റര്‍ യുണൈറ്റഡ് പി.എസ്.ജിയുടെ ഗ്രൗണ്ടില്‍ 3-1ന് ജയിച്ച് ചരിത്രം സൃഷ്ടിച്ചിരുന്നു. പി.എസ്.ജിക്കെതിരായ പ്രകടനം മാഞ്ചസ്റ്റര്‍ യുണൈറ്റഡിന് വിശ്വാസവും പ്രതീക്ഷയും നല്‍കുന്നുണ്ടെന്നും പക്ഷെ ചാമ്പ്യന്‍സ് ലീഗ് സാധ്യത കല്‍പിക്കപ്പെടുന്ന ബാഴ്സലോണക്കെതിരെയാണ് കളിക്കുന്നതെന്ന് തനിക്ക് അറിയാമെന്നും മാഞ്ചസ്റ്റര്‍ യുണൈറ്റഡ് പരിശീലകന്‍ പറഞ്ഞു.
ബാഴ്സലോണ സ്വന്തം ഗ്രൗണ്ടില്‍ വളരെ ശക്തരാണെന്നും അവിടെ പോയി അവരെ തോല്‍പ്പിക്കുക വളരെ പ്രയാസകരമാണെന്നും പരിശീലകന്‍ പറഞ്ഞു. എന്നാല്‍ മാഞ്ചസ്റ്റര്‍ യുണൈറ്റഡിന് ബാഴ്സലോണയില്‍ പോയി അവരെ തോല്‍പ്പിക്കാന്‍ പറ്റുമെന്നും അങ്ങനെ സംഭവിക്കുകയാണെങ്കില്‍ അത് പി.എസ്.ജിയെ തോല്‍പ്പിച്ചതിനേക്കാള്‍ വലിയ നേട്ടമായിരിക്കുമെന്നും സോള്‍ഷ്യര്‍ വ്യക്തമാക്കി.
