തിരുവനന്തപുരം: കോലീബി സഖ്യമെന്ന കോടിയേരിയുടെ പ്രസ്താവന തന്നെ പരാജയം സമ്മതിക്കുന്നതിനുള്ള തെളിവാണെന്ന് ഉമ്മന്‍ചാണ്ടി. ലോക്‌സഭാ തെരഞ്ഞെടുപ്പില്‍ കോണ്‍ഗ്രസ് റെക്കോര്‍ഡ് വിജയം നേടുമെന്നും അദ്ദേഹം പറഞ്ഞു.ഇന്ത്യയില്‍ പോരാട്ടം മോദിയും രാഹുലും തമ്മിലാണ്. ഇക്കാര്യം ബംഗാളിലെ സിപിഎം നേതാക്കള്‍ വരെ സമ്മതിക്കുമെന്നും ഉമ്മന്‍ചാണ്ടി പറഞ്ഞു.
കോണ്‍ഗ്രസ് അക്രമ രാഷ്ട്രീയത്തിനെതിരെ നടത്തുന്ന പ്രചാരണം സിപിഎമ്മിനെ ഭയപ്പെടുത്തുന്നുണ്ട്. ഇതില്‍ നിന്ന് ശ്രദ്ധ തിരിച്ചുവിടാനാണ് കോടിയേരിയുടെ ശ്രമം. ഒന്നാം യുപിഎ സര്‍ക്കാരിനെ താഴെയിറക്കാന്‍ ബിജെപിക്കൊപ്പം വോട്ടു ചെയ്തവരാണ് സിപിഎമ്മെന്നും ഉമ്മന്‍ചാണ്ടി ആരോപിച്ചു.
കര്‍ഷകരുടെ വായ്പകള്‍ക്ക് മൊറട്ടോറിയം ഏര്‍പ്പെടുത്തുന്നതിനുള്ള ഉത്തരവിറക്കുന്നതില്‍ സര്‍ക്കാര്‍ വീഴ്ച വരുത്തിയെന്നും ഉമ്മന്‍ചാണ്ടി കുറ്റപ്പെടുത്തി.ആചാരങ്ങളുടെ പേരിലുണ്ടായ വിഷയങ്ങള്‍ ജനങ്ങളെ സ്വാധീനിക്കും. മതേതരത്വത്തിന്റെ കാര്യത്തില്‍ വിട്ടുവീഴ്ചയില്ല. ലീഗ് – എസ്ഡിപിഐ ചര്‍ച്ച നടന്നിട്ടില്ല. എസ്ഡിപിഐയെ ആശ്രയിക്കേണ്ട കാര്യം ലീഗിനില്ലെന്നും ഉമ്മന്‍ചാണ്ടി വ്യക്തമാക്കി.
