ജീത്തു ജോസഫിന്റെ അടുത്ത ചിത്രത്തില്‍ പൃഥ്വിരാജ് നായകനാകുന്നു. ഊഴം എന്ന് പേരിട്ടിരിക്കുന്ന ചിത്രത്തില്‍ ദിവ്യാ പിള്ളയാണ് നായിക. അയാള്‍ ഞാനല്ല എന്ന ഫഹദ്ഫാസില്‍ ചിത്രത്തില്‍ ദിവ്യ പിള്ള രണ്ട് നായികമാരിലൊരാളായിരുന്നു.
ആക്ഷന്‍ മൂഡിലുള്ള ഒരു പ്രതികാര കഥ പറയുന്ന ചിത്രമാണെങ്കിലും ഊഴം ഒരു ത്രില്ലര്‍ ചിത്രമല്ലെന്ന് സംവിധായകന്‍ ജീത്തു ജോസഫ് പറഞ്ഞു. ജീത്തു തന്നെയാണ് തിരക്കഥയെഴുതുന്നത്. നീരജ് മാധവ്, ഇര്‍ഷാദ്, ജയപ്രകാശ്, സമ്പത്ത് എന്നിവരാണ് മറ്റ് പ്രധാന താരങ്ങള്‍.
അനില്‍ ജോണ്‍സണാണ് ചിത്രത്തിനായി ഗാനങ്ങള്‍ ഒരുക്കിയിരിക്കുന്നത്. ഛായാഗ്രഹണം ശ്യാം ദത്ത്, പ്രൊഡക്ഷന്‍ കണ്‍ട്രോളര്‍ വിനോദ് മംഗലത്ത്, ആര്‍ട്ട് ഡയറക്ടര്‍ സാബു റാം, എഡിറ്റര്‍ അയൂബ് ഖാന്‍.
മാര്‍ച്ച് രണ്ടാം വാരത്തില്‍ ഊഴം ചിത്രീകരണം ആരംഭിക്കും. ചെന്നൈ, ഹൈദരാബാദ്, കോയമ്പത്തൂര്‍, കൊച്ചി എന്നീ സ്ഥലങ്ങളാണ് പ്രധാന ലൊക്കേഷനുകള്‍. ഫൈന്‍ ട്യൂണ്‍ പിക്‌ചേഴ്‌സിനുവേണ്ടി സി.ജോര്‍ജും ആന്റോ പടിഞ്ഞാറേക്കരയുമാണ് ചിത്രം നിര്‍മ്മിക്കുന്നത്.
നേരത്തെ ജീത്തു ജോസഫ് പൃഥ്വിരാജിനെ നായകനാക്കി സംവിധാനം ചെയ്ത മെമ്മറീസ് സൂപ്പര്‍ ഹിറ്റായിരുന്നു.അതിന് ശേഷം ഒരുക്കിയ ദൃശ്യം മെഗാ ഹിറ്റുമായിരുന്നു. ഒടുവില്‍ ജീത്തു സംവിധാനം ചിത്രം ദിലീപ് നായകനായ ലൈഫ് ഒഫ് ജോസൂട്ടിയാണ്.
