ക്യാമ്പസ് പശ്ചാത്തലമാക്കി ടോം ഇമ്മട്ടി സംവിധാനം ചെയ്യുന്ന ‘ഒരു മെക്‌സിക്കന്‍ അപാരത’യുടെ ഔദ്യോഗിക ടൈറ്റില്‍ പുറത്തിറങ്ങി. എഴുപതുകളുടെ പശ്ചാത്തലത്തില്‍ ക്യാമ്പസ് രാഷ്ട്രീയത്തിന്റെ കഥ പറയുന്ന ചിത്രത്തില്‍ ടൊവീനോ തോമസ്, നീരജ് മാധവ്, രൂപേഷ് പീതാംബരന്‍ തുടങ്ങി വന്‍താരനിര തന്നെ അണിനിരക്കുന്നു. ഗായത്രി സുരേഷ് ആണ് നായിക.
കോളേജില്‍ നിന്നും പ്രീഡിഗ്രി വിഭാഗം വേര്‍പിരിയുന്ന കാലത്തെ ക്യാമ്പസ് രാഷ്ട്രീയം സത്യസന്ധമായി ദൃശ്യവല്‍ക്കരിക്കുന്ന ചിത്രത്തില്‍ പ്രണയവും നര്‍മവുമെല്ലാം കോര്‍ത്തിണക്കിയിരിക്കുന്നു. വിദ്യാര്‍ത്ഥിപ്രസ്ഥാനത്തിന്റെ നേതാവായി പോളി എന്ന നായക കഥാപാത്രത്തെ ടൊവിനോ തോമസ്സ് അവതരിപ്പിക്കുമ്പോള്‍ എതിര്‍ഗ്രൂപ്പിലെ തലവനായി സ്വന്തം പേരില്‍ രൂപേഷ് പീതാംബരന്‍ പ്രത്യക്ഷപ്പെടുന്നു.
ജവാന്‍ ഓഫ് വെള്ളിമല, ഹോംലി മീല്‍സ് എന്നീ ചിത്രങ്ങളുടെ സംവിധായകനായ അനൂപ് കണ്ണനാണ് ഒരു മെക്‌സിക്കന്‍ അപാരതയുടെ നിര്‍മാണം. റഫീഖ് അഹമ്മദ് എഴുതിയ വരികള്‍ക്ക് മണികണ്ഠന്‍ അയ്യപ്പന്‍ സംഗീതസംവിധാനം ചെയ്യുന്നു.
