കണ്ണൂര്‍: പാര്‍ട്ടി സമ്മേളനങ്ങള്‍ നടന്നു വരുന്ന സമയത്ത് സ്വന്തം ഫോട്ടോ ഉള്‍പ്പെടുത്തി ഫ്ളക്സ് ബോര്‍ഡുകള്‍ വെക്കുന്നതിനെതിരെ സി.പി.എം കണ്ണൂര്‍ ജില്ലാ സെക്രട്ടറി പി.ജയരാജന്‍.
ശത്രു മാധ്യമങ്ങള്‍ ആയുധമാക്കുന്നതിനാല്‍ ഇത്തരം പ്രവണതകളില്‍ നിന്നും പ്രവര്‍ത്തകര്‍ പിന്‍വാങ്ങണമെന്നും പി.ജയരാജന്‍ പറഞ്ഞു.
ഫെയ്‌സ്ബുക്ക് പോസ്റ്റിലാണ് അദ്ദേഹം തന്റെ ആവശ്യം അറിയിച്ചിരിക്കുന്നത്.
സമ്മേളനത്തിന്റെ ഭാഗമായി പാര്‍ട്ടിയുടെ രാഷ്ട്രീയ സന്ദേശമാണ് പ്രചരിപ്പിക്കേണ്ടത്. അതിന് വേണ്ടിയാണ് എല്ലാവരും പ്രവര്‍ത്തിക്കേണ്ടതെന്നും ജയരാജന്‍ പറഞ്ഞു.
ജയരാജന്റെ പേരിലുള്ള വീഡിയോ ആല്‍ബം വിവാദമായ സാഹചര്യത്തിലാണ് തന്റെ ഫോട്ടോ ഫ്ളക്സ് ബോര്‍ഡില്‍ വരുന്നതിനെതിരെ ജയരാജന്‍ രംഗത്തുവന്നിരിക്കുന്നത്.
ഫേയ്സ് ബുക്ക് പോസ്റ്റിന്റെ പൂർണ്ണരൂപം ചുവടെ
സിപിഐ(എം) സമ്മേളനങ്ങൾ വലിയ ജന പങ്കാളിത്തത്തോട് കൂടി നടന്നുവരികയാണ്.
ജനങ്ങളാകെ മുൻകൈ എടുത്തുകൊണ്ട് വിപുലമായ പ്രചാരണ പ്രവർത്തനങ്ങളും നടക്കുന്നുണ്ട്.എന്നാൽ ചിലയിടങ്ങളിൽ എന്റെ ഫോട്ടോ ഉൾക്കൊള്ളുന്ന ഫ്ളക്സ് ബോർഡുകൾ ഉയർത്തിയതായി കാണാൻ കഴിഞ്ഞു.അത്തരം പ്രവർത്തനങ്ങളിൽ നിന്ന് അവർ പിന്മാറണം.ഇതുയർത്തി ശത്രു മാധ്യമങ്ങൾ ജനങ്ങളിൽ ആശയക്കുഴപ്പം ഉണ്ടാക്കാനാണ് ശ്രമിക്കുന്നത്.അതിനു സഹായകരണമാണ് ഇത്തരം ബോർഡുകൾ.
സമ്മേളനങ്ങളുടെ ഭാഗമായി പാർട്ടിയുടെ രാഷ്ട്രീയ സന്ദേശമാണ് പ്രചരിപ്പിക്കേണ്ടത്.
ഈ ഉദ്ദേശം സാധ്യമാക്കുന്നതിന് വേണ്ടിയാണ് എല്ലാവരും പ്രവർത്തിക്കേണ്ടത്.
