വാഷിംഗ്ടൺ : ഇസ്രയേൽ തലസ്ഥാനമായി ജറുസലേമിനെ പ്രഖ്യാപിക്കാൻ അമേരിക്കൻ പ്രസിഡൻറ് ഡൊണാൾഡ് ട്രംപ് ഒരുങ്ങുന്നതായി റിപ്പോർട്ട്.
നിലവിൽ ഇസ്രയേൽ തലസ്ഥാനം തെൽ അവീവാണ്. പുതിയതായി തലസ്ഥാന മാറ്റമുണ്ടായാൽ ഇല്ലാതാകുന്നത് അമേരിക്കയുടെ 50 വർഷമായുള്ള നയങ്ങളാണ്.
ഇത്തരത്തിൽ മാറ്റമുണ്ടാകുന്നത് പലസ്തീനും മറ്റ് അറേബ്യൻ രാജ്യങ്ങളുമായുള്ള യു.എസ് ബന്ധത്തിൽ കുടുതൽ പ്രശ്നങ്ങൾ സൃഷ്ടിക്കും.
പുതിയ പ്രഖ്യാപനം വരുന്ന ബുധനാഴ്ചയുണ്ടാവുമെന്ന് വൈറ്റ് ഹൗസ് പ്രതിനിധി അറിയിച്ചു. എന്നാൽ വ്യക്തമായ തീരുമാനം നിലവിൽ എടുത്തിട്ടില്ല.
ഇസ്രയേൽ- പലസ്തീൻ പ്രശ്നത്തിലെ പ്രധാന ചർച്ചാവിഷയമാണ് ജറുസലേം.
പുണ്യ ഭൂമിയായ ജറുസലേം മുസ്ലിംകൾക്കും ജൂതൻമാക്കും ക്രിസ്ത്യാനികൾക്കും ഒരുപോലെ പ്രാധാന്യമുള്ള സ്ഥലമാണ്.
ജറുസലേമിന് വേണ്ടി മൂന്ന് വിഭാഗവും വർഷങ്ങളായി അവകാശവാദങ്ങൾ ഉന്നയിക്കുന്നുണ്ട്.
ജറുസലേമിനെ പലസ്തീനും ഇസ്രയേലിനും ഭാഗം ചെയ്ത് നൽകാനുള്ള തീരുമാനത്തെ ബിൽ ക്ലിൻറൺ, ബുഷ്, ബറാക് ഒബാമ തുടങ്ങിയവർ അംഗീകരിച്ചിരുന്നു.
എന്നാൽ വിഭജിച്ച് നൽകാനുള്ള തീരുമാനത്തെ ഡൊണാൾഡ് ട്രംപ് നിലവിൽ അംഗീകരിച്ചിട്ടില്ല.
പക്ഷെ ഹാരി ട്രൂമാൻ മുതലുള്ള അമേരിക്കൻ പ്രസിഡൻറുമാർ ഇസ്രയേലിന്റെ വാദങ്ങൾ തള്ളുകയും പലസ്‌തീനുമായി ചർച്ച നടത്തി പരിഹാരം കാണാതെ ജറുസലേമിലുള്ള ഇസ്രയേലിന്റെ അവകാശം അംഗീകരിക്കില്ലെന്നും പറയുകയും ചെയ്തിരുന്നു.
