ലക്‌നൗ: പ്രായപൂർത്തിയാകാത്ത പെൺകുട്ടിയെ ബലാത്സംഗത്തിന് ഇരയാക്കുകയും പീഡന ദൃശ്യങ്ങൾ പകർത്തി സമൂഹമാധ്യമങ്ങളിൽ പ്രചരിപ്പിക്കുകയും ചെയ്‌ത സംഭവത്തിൽ ദമ്പതികൾ അറസ്റ്റിൽ. ഉത്തർപ്രദേശിലെ ബദാവുൻ ജില്ലയിലെ ഫൈസ്ഗഞ്ച് ബേട്ടാ പൊലീസ് സ്റ്റേഷൻ പരിധിയിലാണ് സംഭവം. പെൺകുട്ടിയുടെ പരാതിയിൽ പ്രതികളെ അറസ്റ്റ് ചെയ്‌തതായി പൊലീസ് ഉദ്യോഗസ്ഥൻ ചരൺ സിങ് റാണ മാധ്യമങ്ങളോട് പറഞ്ഞു.
ജൂലൈ 12 നു ഗ്രാമത്തിലുള്ള യുവാവ് വീട്ടിലേക്ക് വിളിച്ചു വരുത്തി പീഡിപ്പിച്ചെന്നും പീഡന ദൃശ്യങ്ങൾ യുവാവിന്റെ ഭാര്യ മൊബൈൽ ഫോണിൽ ചിത്രീകരിച്ചെന്നും പെൺകുട്ടിയുടെ പരാതിയിൽ പറയുന്നു. സംഭവം പുറത്തുപറഞ്ഞാൽ വീഡിയോ ദൃശ്യങ്ങൾ പ്രചരിപ്പിക്കുമെന്ന് പ്രതികൾ ഭീഷണി മുഴക്കിയതായും പെൺകുട്ടി പരാതിയിൽ പറയുന്നു. സംഭവിച്ച കാര്യങ്ങൾ പെൺകുട്ടി വീട്ടിൽ പറഞ്ഞതോടെയാണ് പ്രതിയുടെ ഭാര്യ ദൃശ്യങ്ങൾ സമൂഹമാധ്യമങ്ങൾ വഴി പ്രചരിപ്പിച്ചത്. ബലാത്സംഗം, പോക്സോ, ഐടി വകുപ്പുകൾ ചുമത്തിയാണ് ദമ്പതികളെ അറസ്റ്റ് ചെയ്തിരിക്കുന്നത്.
