മലപ്പുറം : വിവാഹിതയായ യുവതിയെ പീഡിപ്പിച്ച കേസില്‍ ഒളിവിലായിരുന്ന പ്രതി പൊലീസിന്റെ പിടിയില്‍. നീലാഞ്ചേരി കൂരി മുണ്ട സ്വദേശി ചെമ്മലപുറവന്‍ താഹിറിനെയാണ് കരുവാരക്കുണ്ട് പൊലീസ് അറസ്റ്റ് ചെയ്തത്.
യുവതിയെ പ്രലോഭിപ്പിച്ച് പല സ്ഥലങ്ങളില്‍വച്ചും ഇയാള്‍ പീഡിപ്പിച്ചതായി പൊലീസ് കണ്ടെത്തി. പഴയ സ്‌കൂള്‍ ബന്ധം വച്ചാണ് പ്രതി യുവതിയോട് അടുത്തത്. സ്‌കൂള്‍ പൂര്‍വവിദ്യാര്‍ഥി വാട്ട്‌സ്ആപ്പ് ഗ്രൂപ്പിലെ പരിചയം മുതലാക്കി ലൈംഗികചൂഷണത്തിന് ഇരയാക്കുകയായിരുന്നു.
പ്രണയം നടിച്ച് വിവാഹവാഗ്ദാനം നല്‍കി യുവതിയെ ഇയാള്‍ പലപ്പോഴായി പീഡിപ്പിച്ചെന്ന് പൊലീസ് പറയുന്നു. ബന്ധം പുറത്തറിഞ്ഞതോടെ പ്രതി യുവതിയെ കൈയ്യൊഴിഞ്ഞു. തുടര്‍ന്ന് യുവതി സ്റ്റേഷനില്‍ പരാതി നല്‍കി.
ഇതോടെ ഒളിവില്‍ പോയ യുവാവ് വിദേശത്തേക്ക് കടക്കാനുള്ള തയാറെടുപ്പിലായിരുന്നു. എന്നാല്‍ രഹസ്യവിവരത്തെ തുടര്‍ന്ന് നീലാഞ്ചേരിയില്‍ വച്ച് പ്രതിയെ അറസ്റ്റ് ചെയ്തു. ഇയാളെ വെള്ളിയാഴ്ച മഞ്ചേരി കോടതിയില്‍ ഹാജരാക്കി റിമാന്‍ഡ് ചെയ്തു.
