കോട്ടയം: കൊല്ലം-തേനി ദേശീയപാതയിൽ പൊൻകുന്നത്തിന് സമീപം കടുക്കാമല വളവിൽ ബസുകൾ കൂട്ടിയിടിച്ച് ആറ് പേർക്ക് പരിക്കേറ്റു. കെഎസ്ആർടിസി ബസും സ്വകാര്യ ബസും തമ്മിലാണ് കൂട്ടിയിടിച്ചത്. പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചു.
കെഎസ്ആർടിസി ബസ് ഡ്രൈവർ പുഞ്ചവയൽ സ്വദേശി പ്രമോദ് (45), വാഴൂർ സ്വദേശികളായ വിജയകുമാർ, സുജാത, എലിസബത്ത്, കുമളി സ്വദേശിനി ബീന, ബിജോ ജോയി എന്നിവർക്കാണ് പരിക്കേറ്റത്.
രാവിലെ 9.30 ഓടെയായിരുന്നു അപകടം. കുമളിയിൽ നിന്നും കോട്ടയത്തേക്ക് പോയ കെഎസ്ആർടിസി ഫാസ്റ്റ് പാസഞ്ചറും ചങ്ങനാശേരിയിൽ നിന്നും മുണ്ടക്കയത്തേക്ക് പോയ ഐശ്വര്യ ബസുമാണ് അപകടത്തിൽപെട്ടത്. അപകടത്തിന് പിന്നാലെ ദേശീയപാതയിൽ അല്പനേരം ഗതാഗതം തടസപ്പെട്ടു. പൊൻകുന്നം പോലീസ് സ്ഥലത്തെത്തി മേൽനടപടികൾ സ്വീകരിച്ചു.
