ജുനൈസ് മുഹമ്മദിന്റെ സംവിധാനത്തില്‍ ഒരുങ്ങുന്ന സയന്‍സ് ഫിക്ഷന്‍ ചിത്രം 9ല്‍ പ്രകാശ് രാജ് എത്തുന്നു. പ്രിഥ്വിരാജ് പ്രധാന വേഷത്തില്‍ എത്തുന്ന ചിത്രത്തില്‍ വില്ലന്‍ വേഷമാണ് പ്രകാശ് രാജിന് എന്നാണ് സൂചന. ഇനിയത് ഖാന്‍ എന്ന ഡോക്റ്റര്‍ കഥാപാത്രമാണ് പ്രകാശ് രാജിന്, കാരക്റ്റര്‍ പോസ്റ്റര്‍ അണിയറ പ്രവര്‍ത്തകര്‍ പുറത്തുവിട്ടു.
ചിത്രത്തിന്റെ രണ്ടാം ഷെഡ്യൂള്‍ ഷൂട്ടിംഗ് പൂര്‍ത്തിയായി. പാലയും സമീപ പ്രദേശങ്ങളുമായിരുന്നു ആദ്യ ഷെഡ്യൂളിലെ ലൊക്കേഷന്‍. രണ്ടാം ഷെഡ്യൂളില്‍ ഹിമാലയന്‍ മേഖലയിലാണ് പ്രധാനമായും ഷൂട്ടിംഗ് നടന്നത്. ഇനി ഡെല്‍ഹി കേന്ദ്രീകരിച്ചായിരിക്കും അടുത്ത ഷെഡ്യൂള്‍ ആരംഭിക്കുന്നത്.
ചിത്രത്തില്‍ ശാസ്ത്രജ്ഞന്റെ വേഷത്തിലാണ് പ്രിഥ്വിരാജ് എത്തുന്നത്. വാമിഖ ഹബ്ബിയും മമ്ത മോഹന്‍ദാസുമാണ് ചിത്രത്തില്‍ നായികമാരായി എത്തുന്നത്. 100 ഡേയ്സ് ഓഫ് ലൗ എന്ന ദുല്‍ഖര്‍ ചിത്രത്തിനു ശേഷം ജുനൈസ് സംവിധാനം ചെയ്യുന്ന ചിത്രമാണിത്. ഓഗസ്റ്റ് സിനിമാസിലെ പങ്കാളിത്തം അവസാനിപ്പിച്ച ശേഷം പ്രിഥ്വിരാജ് ആദ്യമായി നിര്‍മിക്കുന്ന ചിത്രം എന്ന സവിശേഷതയും നയനുണ്ട്. സോണി പിക്ചേര്‍സുമായി സഹകരിച്ചാണ് പ്രഥിരാജ് പ്രൊഡക്ഷന്‍സ് ചിത്രം അവതരിപ്പിക്കുന്നത്.
