കോഴിക്കോട്: കോഴിക്കോട് വടകരയില്‍ സ്വകാര്യ ബസില്‍ നിന്ന് റോഡിലേക്ക് വീണ് ഗര്‍ഭിണിക്ക് പരിക്കേറ്റ സംഭവത്തില്‍ ബസ് ജീവനക്കാരനെ പൊലീസ് കസ്റ്റഡിയിലെടുത്തു. യുവതി നല്‍കിയ പരാതിയുടെ അടിസ്ഥാനത്തിലാണ് ജീവനക്കാരനെ കസ്റ്റഡിയിലെടുത്തത്. ഇവരെ ചോദ്യം ചെയ്ത് വരികയാണ്. കോഴിക്കോട്-കണ്ണൂര്‍ റൂട്ടില്‍ സര്‍വീസ് നടത്തുന്ന ഡി ടി എസ് എഫ് 4 എന്ന ബസും പൊലീസ് കസ്റ്റഡിയിലെടുത്തു.
ഇരിങ്ങല്‍ സ്വദേശി ദിവ്യയ്ക്കാണ് ബസില്‍ നിന്ന് വീണ് പരിക്കേറ്റത്. ഇരിങ്ങലില്‍ ഇവര്‍ കയറുന്നതിനു മുമ്പ് ബസ് മുന്നോട്ടെടുത്തതാണ് അപകടത്തിന് കാരണമായത്. യുവതി വീഴുന്നതു കണ്ടിട്ടും ജീവനക്കാരന്‍ ബസ് നിര്‍ത്താതെ പോയി. പിന്നീട് നാട്ടുകാരാണ് ഇവരെ ആശുപത്രിയിലെത്തിച്ചത്.
