തിരുവനന്തപുരം: ഓണകിറ്റില്‍ ഏലക്ക വാങ്ങിയതില്‍ 8 കോടി രൂപയുടെ അഴിമതിയെന്ന് പി ടി തോമസ് എംഎല്‍എ. കൃഷിക്കാരില്‍ നിന്ന് ഏലം നേരിട്ട് സംഭരിക്കാതെ ഇടനിലക്കാരില്‍ നിന്ന് വാങ്ങിയതില്‍ ക്രമക്കേടെന്നും അദ്ദേഹം പറഞ്ഞു.
അതേസമയം മലയോരത്ത് സര്‍ക്കാരിന്റെ സൗജന്യ ഓണകിറ്റ് വിതരണം മുടങ്ങി. ഓണത്തിന് മുന്‍പ് വിതരണം പൂര്‍ത്തിയാക്കാന്‍ കഴിയില്ലെന്ന് റേഷന്‍കട ഉടമകള്‍ പറയുന്നു. മിക്ക റേഷന്‍ കടകളിലും ഓണകിറ്റുകള്‍ തയ്യാറാണെങ്കിലും കിറ്റുകളില്‍ ഏലക്ക ഇല്ലാത്തതിനാലാണ് വിതരണം മുടങ്ങാന്‍ കാരണം.
15 ഭക്ഷ്യ വിഭവങ്ങളാണ് ഭക്ഷ്യ വകുപ്പിന്റെ നേതൃത്വത്തില്‍ വിതരണം ചെയ്യുന്ന സൗജന്യ ഓണക്കിറ്റില്‍ ഉള്‍പ്പെടുത്തിയിട്ടുള്ളത്. ഇതില്‍ പതിനാല് സാധനങ്ങളും ഉള്‍പ്പെടുത്തി കിറ്റുകള്‍ തയ്യാറാക്കി വച്ചിട്ടുണ്ടെങ്കിലും ഏലക്ക ലഭിക്കാത്തതിനാല്‍ കിറ്റ് വിതരണം ചെയ്യാന്‍ സാധ്യമല്ല എന്നാണ് റേഷന്‍ കടകളില്‍ നിന്നും ലഭിക്കുന്ന മറുപടി.
