അന്‍പത്തിയാറാം ജന്മദിനത്തില്‍ ആരാധകര്‍ക്ക് സമ്മാനവുമായി മോഹന്‍ലാല്‍. പുലിമുരുകന്റെ ടീസറാണ് ആരാധകര്‍ക്കുളള മോഹന്‍ലാലിന്റെ സമ്മാനം.
വൈശാഖ് സംവിധാനം ചെയ്യുന്ന പുലിമുരുകന്‍ മോഹന്‍ലാലിന്റെ ഓണച്ചിത്രമാണ്. പോക്കിരിരാജ ഒരുക്കിയ മുളകുപ്പാടം ഫിലിംസാണ് പുലിമുരുകന്‍ എന്ന ബിഗ് ബജറ്റ് ചിത്രം നിര്‍മ്മിക്കുന്നത്.
മലയാളത്തിലെ ഏറ്റവും ബിഗ് ബജറ്റ് ക്യാന്‍വാസിലാണ് ചിത്രം ഒരുക്കുന്നത്. മമ്മൂട്ടി-ഹരിഹരന്‍ കൂട്ടുകെട്ടില്‍ പുറത്തിങ്ങിയ പഴശ്ശിരാജയ്ക്ക് ശേഷം ഒരുങ്ങുന്ന ഏറ്റവും മുതല്‍മുടക്കുള്ള ചിത്രം.
15 കോടിയാണ് സിനിമയുടെ ഏകദേശ ബഡ്ജറ്റ്. ശിവാജി, അന്യന്‍, യന്തിരന്‍, ഐ , ബാഹുബലി എന്നീ ചിത്രങ്ങളുടെയൊക്കെ ആക്ഷന്‍ കൈകാര്യം ചെയ്ത, തെന്നിന്ത്യന്‍ സിനിമയിലെ തന്നെ ഏറ്റവും വിലയേറിയ സ്റ്റണ്ട് കൊറിയോഗ്രാഫറായ പീറ്റര്‍ ഹെയ്ന്‍ ആണ് പുലിമുരുകന്റെ സ്റ്റണ്ട് ഡയറക്ടര്‍.
കാലാപാനി എന്ന ചിത്രത്തിന് ശേഷം മോഹന്‍ലാല്‍ പ്രഭു കൂട്ടുകെട്ട് സിനിമയുടെ മറ്റൊരു പ്രത്യേകതയാകും. ബാല, വിനു മോഹന്‍ എന്നിവരാണ് മറ്റുതാരങ്ങള്‍.
