പുണെ: ഇന്ത്യന്‍ ഫുട്‌ബോള്‍ മാമാങ്കം ഐഎസ്എല്ലില്‍ ഇന്ന് പുണെ സിറ്റി എഫ്.സിയും ഡല്‍ഹി ഡൈനാമോസും തമ്മില്‍ കൊമ്പുകോര്‍ക്കും.
ടൂര്‍ണമെന്റില്‍ സ്ഥിരത പുലര്‍ത്തിയിട്ടുള്ള ഡല്‍ഹിക്ക് കടുത്ത എതിരാളികളാവും ഈ സീസണിലെ ഏറ്റവും മികച്ച മുന്നേറ്റ നിരയുള്ള പുണെ സിറ്റി സംഘം.
രാത്രി എട്ട് മണിക്ക് പുണെയില്‍ വെച്ചാണ് മല്‍സരം.
കഴിഞ്ഞ രണ്ടു തവണയും സെമി ഫൈനലിലെത്തിയ ഡല്‍ഹി ഡൈനമോസ് ഇക്കുറി വ്യക്തമായ ലക്ഷ്യത്തോടെയാണ് തയ്യാറെടുത്തത്.
മിഗ്വേല്‍ ഏയ്ഞ്ചല്‍ പോര്‍ച്ചുഗല്‍ എന്ന മുന്‍ റയല്‍ മഡ്രിഡ് താരത്തിന്റെ പരിശീലനത്തിലാണ് ഡല്‍ഹി എത്തുന്നത്.
മാര്‍സലീഞ്ഞോ പുണെയിലേക്കും അനസ് എടത്തൊടിക ജംഷഡ്പൂരിലേക്കും ചേക്കേറിയത് ഡൈനമോസിന് ക്ഷീണമുണ്ടാക്കുന്നുണ്ട്.
മാര്‍സലീഞ്ഞോയ്‌ക്കൊപ്പം എമിലിയാനോ ആല്‍ഫരോ കൂടി എത്തിയതോടെ ഏറ്റവും മികച്ച മുന്നേറ്റം പുണെയ്ക്ക് സ്വന്തമായിട്ടുണ്ട്.
അതിനാല്‍ തന്നെ കരുത്തര്‍ തമ്മില്‍ നടക്കുന്ന ഏറ്റുമുട്ടല്‍ ആരാധകര്‍ക്ക് ഹരം പകരുമെന്നതില്‍ സംശയമില്ല.
