പുതുക്കോട്ടയിലെ പുതുമണവാളന് രണ്ടാം ഭാഗം ഒരുക്കാന്‍ പദ്ധതിയിടുന്നതായി സംവിധായകന്‍ റാഫി. ഗാനഭൂഷണം ബ്രദേഴ്‌സ് വീണ്ടുമെത്തുന്ന ചിത്രത്തില്‍ ആദ്യ ഭാഗത്തില്‍ നിന്ന് മറ്റ് ഏതെല്ലാം കഥാപാത്രങ്ങള്‍ ഉണ്ടാകുമെന്ന് വ്യക്തമല്ല. റാഫി-മെക്കാര്‍ട്ടിന്‍ കൂട്ടുകെട്ടിന്റെ സംവിധാനത്തില്‍ പിറന്ന സൂപ്പര്‍ഹിറ്റ് കോമഡി ചിത്രമാണ് പുതുക്കോട്ടയിലെ പുതുമണവാളന്.
1995 ലാണ് ജയറാമിനെയും പ്രേംകുമാറിനെയും പ്രധാന കഥാപാത്രങ്ങളാക്കി ചിത്രം പ്രദര്‍ശനത്തിനെത്തുന്നത്. ആനി നായികയായി എത്തിയ ചിത്രത്തില്‍ പ്രസീത, ഇന്നസെന്റ്, വെട്ടുകിളി പ്രകാശന്‍, വി ഡി രാജപ്പന്‍, ജഗതി, ജനാര്‍ദനന്‍, ക്യാപ്റ്റന്‍ രാജു, രാജന്‍ പി ദേവ്, കുഞ്ചന്‍, മാള തുടങ്ങിയവരും മിന്നുന്ന പ്രകടനമാണ് കാഴ്ചവെച്ചത്. ഗാനഭൂഷണം ഗിരീഷ് കൊച്ചിനും ഗാനഭൂഷണം സതീഷ് കൊച്ചിനുമായി ജയറാമും പ്രേം കുമാറും തകര്‍ത്താടിയ ചിത്രത്തിന് ഇന്നും ടിവിയില്‍ പ്രേക്ഷകരേറേയാണ്.
