ദോഹ: ഖത്തറില്‍ കൊവിഡ് ചികിത്സയ്ക്ക് അടിയന്തിര ഘട്ടങ്ങളില്‍ പുതിയ മരുന്ന് പരീക്ഷിക്കുന്നതായി ഹമദ് മെഡിക്കല്‍ കോര്‍പ്പറേഷന്റെ (എച്ച്എംസി) കമ്മ്യൂണിക്കബ്ള്‍ ഡിസീസ് സെന്റര്‍ മെഡിക്കല്‍ ഡയറക്ടര്‍ ഡോ. മുന അല്‍ മസ്ലമാനി പറഞ്ഞു. ‘കൊവിഡ്- 19 രോഗികള്‍ക്കായി പുതിയ മരുന്ന് നല്‍കി തുടങ്ങിയിട്ടുണ്ട്. ഈ മരുന്നിന്റെ ഒരു ഡോസ് മാത്രമാണ് രോഗബാധിതര്‍ക്ക് നല്‍കുന്നത്. ഇത് ഞരമ്പിലേക്ക് നേരെ കുത്തിവയ്ക്കുകയാണ് ചെയ്യുന്നത്’- എച്ച്എംസി ട്വിറ്റര്‍ അക്കൗണ്ടില്‍ പങ്കുവെച്ച വീഡിയോ സന്ദേശത്തില്‍ ഡോ. മുന അല്‍ മസ്ലമാനി വ്യക്തമാക്കി.
കൃത്യമായ മാനദണ്ഡങ്ങള്‍ക്ക് വിധേയമായാണ് മരുന്ന് നല്‍കുന്നതെന്നും അവര്‍ പറഞ്ഞു. ആരോഗ്യനില തിരിച്ചുപിടിക്കാനാവാത്ത വിധം വഷളാകുമെന്ന് കരുതുന്ന രോഗികള്‍ക്കാണ് ഈ മരുന്ന് നല്‍കുന്നത്. ശരീരത്തില്‍ വൈറസിന്റെ പുനരുല്‍പാദനം തടയാന്‍ ഇതുവഴി സാധിക്കും. ഇത്തരം രോഗികളെ കൃത്യമായ നിരീക്ഷണത്തിലൂടെ തിരിച്ചറിഞ്ഞ് അവരുടെ ആരോഗ്യനില മോശമാവുന്നതിന് മുമ്പ് ഈ മരുന്ന് നല്‍കുകയാണ് ചെയ്യുന്നത്. എന്നാല്‍, ഈ മരുന്ന് ഏതാണെന്ന് അവര്‍ വ്യക്തമാക്കിയിട്ടില്ല.
