ഹൈദരാബാദ്: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ വിമര്‍ശിച്ച് ബി.ജെ.പി വൈസ് പ്രസിഡന്റ് ശിവ് രാജ് സിങ് ചൗഹാന്‍ രംഗത്ത്.
മുങ്ങുന്ന കപ്പലില്‍ അവസാന നിമിഷംവരെ തുടര്‍ന്ന് യാത്രക്കാരെ രക്ഷപ്പെടുത്താന്‍ ശ്രമിക്കുന്നതിനു പകരം അതില്‍നിന്ന് ആദ്യം ചാടി രക്ഷപ്പെടാനാണ് രാഹുല്‍ ശ്രമിക്കുന്നത്. നിലവില്‍ കോണ്‍ഗ്രസിനെ നയിക്കുന്നത് ആരാണെന്നുപോലും ആര്‍ക്കും അറിയില്ല. മുങ്ങുന്ന കപ്പലില്‍ അവസാന നിമിഷംവരെ തുടരുകയാണ് ക്യാപ്റ്റന്‍ ചെയ്യേണ്ടത്-ശിവ് രാജ് സിങ് ചൗഹാന്‍ പറഞ്ഞു.
ലോക്‌സഭ തെരഞ്ഞെടുപ്പിന് പിന്നാലെ എസ്.പി – ബി.എസ്.പി സഖ്യം തകരുകയും രാഹുല്‍ഗാന്ധി കോണ്‍ഗ്രസില്‍നിന്ന് ‘ചാടുകയും’ ചെയ്തതോടെ പ്രതിപക്ഷത്തിന്റെ നില പരുങ്ങലിലാണ്. തെലങ്കാനയില്‍ സര്‍ക്കാര്‍ രൂപവത്കരിക്കുകയാണ് ബിജെപിയുടെ അടുത്ത ലക്ഷ്യം. മധ്യപ്രദേശിലെ ക്രമസമാധാന നില തകര്‍ന്നിരിക്കുന്നു. കോണ്‍ഗ്രസിന് വോട്ടുചെയ്തതില്‍ ജനങ്ങള്‍ ഇന്ന് ദുഃഖിക്കുന്നു. സെക്രട്ടേറിയറ്റ് ഇടനിലക്കാരുടെ താവളമായി മാറിയെന്നും മുന്‍ മുഖ്യമന്ത്രികൂടിയായ അദ്ദേഹം പറഞ്ഞു.
