എറണാകുളം: മൂവാറ്റുപുഴ കല്ലൂര്‍കാട് അനധികൃതമായ് പ്രവര്‍ത്തിച്ചിരുന്ന ചെങ്കല്‍ ക്വാറിയില്‍ നടന്ന റെയ്ഡില്‍ വാഹനങ്ങളും ഉപകരണങ്ങളും പൊലീസ് പിടിച്ചെടുത്തു. രഹസ്യ വിവരത്തെ തുടര്‍ന്ന് നടത്തിയ നീക്കത്തിലാണ് ജെസിബിയും ടിപ്പറും ലോറികളും ടില്ലറുകളുമടങ്ങുന്നവ കല്ലൂര്‍കാട് പൊലീസ് പിടികൂടിയത്.
നാഗപ്പുഴ പത്തുകുത്തി കാരംകുന്നേല്‍ ശ്യാമളന്റെ പുരയിടത്തിലാണ് ഒരാഴ്ചയോളമായ് അനധികൃത ചെങ്കല്‍ ഖനനം നടന്നിരുന്നത്. 60 മീറ്റര്‍ നീളത്തിലും 20 മീറ്റര്‍ വീതിയിലും 10 മീറ്റര്‍ ആഴത്തിലുമായിരുന്നു ഖനനം. അശമന്നൂര്‍ സ്വദേശി സനൂപിന്റെ നേതൃത്വത്തിലായിരുന്നു ഖനന ജോലികള്‍ നടത്തിയിരുന്നത്. ഖനനം സംബന്ധിച്ച ഒരുവിധ അനുമതികളും കല്ലൂര്‍കാടു പൊലീസിനു മുന്നില്‍ ഹാജരാക്കാന്‍ അവര്‍ക്കായില്ല. .അനധികൃത ഖനനം സംബന്ധിച്ചും പിടികൂടിയ വാഹനങ്ങളുടടേതുമടക്കം റിപ്പോര്‍ട്ട് ജില്ലാ കളക്ടര്‍ക്ക് നല്‍കുമെന്ന് പൊലീസ് അറിയിച്ചു.
