ജയ്പുര്‍: കുഞ്ഞുങ്ങളെ ലൈംഗീകമയി പീഡിപ്പിക്കുന്നവര്‍ക്ക് ഇനി രാജസ്ഥാനില്‍ വധശിക്ഷ. ഇതുമായി ബന്ധപ്പെട്ട ബില്‍ രാജസ്ഥാന്‍ നിയമസഭ പാസാക്കി.
ആഭ്യന്തര മന്ത്രി ഗുലാബ് ചന്ദ് കതാരിയ അവതരിപ്പിച്ച ബില്‍ ശബ്ദവോട്ടോടെയാണ് പാസാക്കിയത്. ഇന്ത്യന്‍ ശിക്ഷാ നിയമത്തിലെ 376 എഎ യില്‍ ഭേദഗതി വരുത്തിയാണ് വധശിക്ഷ ഉറപ്പ് വരുത്തിയിരിക്കുന്നത്. പന്ത്രണ്ട് വയസിനു താഴെയുള്ള കുട്ടികളെ പീഡിപ്പിക്കുന്നവര്‍ക്ക് വധശിക്ഷയോ, ജീവപര്യന്തത്തില്‍ കുറയാത്ത കഠിനതടവോ നല്‍കാന്‍ തീരുമാനിച്ചിരിക്കുന്നു. ജീവപര്യന്തം മരണം വരെ തടവാണെന്നും ഭേദഗതിയില്‍ പറയുന്നു.
നേരത്തെ മധ്യപ്രദേശും സമാനമായ ബില്‍ പാസാക്കിയിരുന്നു. ഹരിയാനയും ഇത്തരത്തില്‍ ബില്‍ പാസാക്കാന്‍ ഒരുങ്ങുകയാണ്. മഹാരാഷ്ട്രയും കര്‍ണാടകയും കുട്ടികളെ പീഡിപ്പിക്കുന്നവര്‍ക്ക് വധശിക്ഷ നല്‍കാനുള്ള നീക്കത്തിലാണ്.
