ചാലക്കുടി: അങ്കമാലിയില്‍ കൊല്ലപ്പെട്ട റിയല്‍ എസ്‌റ്റേറ്റ് ബ്രോക്കര്‍ രാജീവുമായി കൊച്ചിയിലെ പ്രമുഖ അഭിഭാഷകന്‍ സിപി. ഉദയഭാനുവിനുള്ള ബന്ധം വ്യക്തമാക്കുന്ന സിസിടിവി ദൃശ്യങ്ങള്‍ പുറത്ത്.
ഉദയഭാനു പല തവണ രാജീവിന്റെ വീട്ടില്‍ എത്തിയിരുന്നതിന്റെ സിസിടിവി ദൃശ്യങ്ങളാണ് പുറത്തുവന്നത്. ഇത് നേരത്തേ പോലീസിന് ലഭിച്ചിരുന്നെങ്കിലും ഇപ്പോഴാണു ദൃശ്യങ്ങള്‍ പുറത്താകുന്നത്.
ഉദയഭാനുവിനു സംഭവവുമായി നേരിട്ടു ബന്ധമുണ്ടെന്നു തെളിയിക്കുന്ന ശക്തമായ തെളിവുകള്‍ ലഭിച്ചതായി പോലീസ് സൂചിപ്പിച്ചു.
അതേസമയം അഭിഭാഷകനെ അറസ്റ്റു ചെയ്യുന്നതു ഹൈക്കോടതി താത്കാലികമായി തടഞ്ഞിരിക്കുകയാണ്. തെളിവുകള്‍ ലഭിച്ച സാഹചര്യത്തില്‍ അഭിഭാഷകനു രക്ഷപ്പെടാന്‍ കഴിയാത്തവിധം പോലീസ് വലവിരിച്ചു കഴിഞ്ഞു. അഭിഭാഷകനെതിരെയുള്ള തെളിവുകള്‍ ഹൈക്കോടതിയില്‍ പോലീസ് ഹാജരാക്കും.
കൊല ചെയ്യപ്പെട്ട രാജീവിനും അറസ്റ്റിലായ പ്രതി ചക്കര ജോണിക്കും ക്വട്ടേഷന്‍ സംഘങ്ങളുമായി ബന്ധമുണ്ട്. പരിയാരം തവളപ്പാറയില്‍ രാജീവ് സുരക്ഷിതനായിട്ടാണ് കഴിഞ്ഞിരുന്നത്. പല ക്വട്ടേഷന്‍ ഗുണ്ടാസംഘങ്ങളും രാജീവിന്റെ സുരക്ഷയ്ക്കുവേണ്ടി പരിയാരത്തെ താമസസ്ഥലത്തു ക്യാമ്പ് ചെയ്തിരുന്നുവെന്ന് അറിവായിട്ടുണ്ട്.
