കീവ്: യുക്രയിന്‍ തലസ്ഥാനമായ കീവില്‍ ഉണ്ടായ കാര്‍ബോംബ് സ്‌ഫോടനത്തില്‍ പ്രശസ്ത മാധ്യമപ്രവര്‍ത്തകന്‍ പാവെല്‍ ഷെറെമെറ്റ് കൊല്ലപ്പെട്ടു.
സ്വതന്ത്ര വാര്‍ത്താ വെബ്‌സൈറ്റായ യുക്രയിന്‍സ്‌ക പ്രവ്ദയില്‍ ജോലി ചെയ്തുവരുകയായിരുന്നു. റഷ്യന്‍ പൗരത്വമുളള ബെലറൂസുകാരനാണ് ഷെറമെറ്റ്. ഇവാന ഫ്രാങ്ക തെരുവിലൂടെ കാറോടിച്ച് പോകുമ്പോഴാണ് സംഭവം.
റിമോട്ട് നിയന്ത്രിത ബോംബ് ആണിതെന്നും 400 മുതല്‍ 600 ഗ്രാം വരെ ടിഎന്‍ടി ഇതില്‍ അടങ്ങിയിരിക്കുന്നതായും ഔദ്യോഗിക വൃത്തങ്ങള്‍ പറഞ്ഞു. പാവെലിന്റെ മരണം കൊലപാതകമാണെന്ന് പ്രോസിക്യൂട്ടര്‍ ജനറല്‍ യുറിവ് ലുട്ട്‌സെങ്കോ ഫേസ്ബുക്കില്‍ കുറിച്ചു.
സംഭവം ദൗര്‍ഭാഗ്യകരമായിപ്പോയെന്ന് യുക്രെയ്ന്‍ പ്രസിഡന്റ് പെട്രോ പൊറോഷെങ്കെ പറഞ്ഞു. സംഭവം തീവ്രവാദി ആക്രമണമാണോയെന്ന് സ്ഥിരീകരിച്ചിട്ടില്ല.
