ന്യൂയോര്‍ക്ക്: റോജര്‍ ഫെഡറര്‍ യുഎസ് ഓപ്പണിന്റെ ക്വാര്‍ട്ടര്‍ കാണാതെ പുറത്ത്. ഓസ്‌ട്രേലിയയുടെ ജോണ്‍ മില്‍മാനോട് പരാജയപ്പെട്ടാണ് ഫെഡറര്‍ മടങ്ങുന്നത്. സ്‌കോര്‍ 3-6 7-5 7-6 7-6. റോജര്‍ ഫെഡര്‍ക്കെതിരേ മില്‍മാന്റെ ആദ്യ വിജയമാണിത്.
ടൂര്‍ണമെന്റില്‍ രണ്ടാം സീഡാണ് റോജര്‍ ഫെഡറര്‍. ആ ആധികാരികത ആദ്യ സെറ്റില്‍ തന്നെ ഫെഡറര്‍ കാണിച്ചിരുന്നു. ആദ്യ സെറ്റ് സ്വിസ് താരം നേടിയപ്പോള്‍ തുടര്‍ന്നുള്ള മൂന്ന് സെറ്റുകളിലും ഫെഡറര്‍ കീഴടങ്ങി. മത്സരത്തിലുടനീളം വരുത്തിയ ഡബിള്‍ ഫാള്‍ട്ടുകളും അണ്‍ഫോഴ്‌സ്ഡ് എററുകളുമാണ് ഫെഡററെ വീഴ്ത്തിയത്.
ക്വാര്‍ട്ടറില്‍ നോവാക് ജോക്കോവിച്ചാണ് മില്‍മാന്റെ എതിരാളികള്‍. മറ്റൊരു ക്വാര്‍ട്ടറില്‍ റാഫേല്‍ നദാല്‍ ഡൊമിനിക് തീമിനേയും, മരീന്‍ സിലിച്ച് കീ നിഷികോറിയേയും നേരിടും.
