ഡൽഹി: റോജി എം ജോൺ എംഎൽഎയെ എഐസിസി സെക്രട്ടറിയായി നിയമിച്ച് കോൺഗ്രസ് ഹൈക്കമാൻഡ്. പിസി വിഷ്ണുനാഥിനോടൊപ്പം കർണാടകയുടെ ചുമതല വഹിക്കും. എൻഎസ്‌യു ദേശീയ അദ്ധ്യക്ഷനായിരുന്നു. വിദ്യാർത്ഥി സംഘടന നേതാവായിരിക്കേ കർണാടകയിൽ പ്രവർത്തിച്ച പരിചയവും അദ്ദേഹത്തിനുണ്ട്.
അടുത്ത വർഷം കർണാടക നിയമസഭ തെരഞ്ഞെടുപ്പ് നടക്കാനിരിക്കേയാണ് റോജിയെ എഐസിസി സെക്രട്ടറിയായി നിയമിച്ചിരിക്കുന്നത്. ദേശീയ നേതൃത്വത്തോടൊപ്പം പ്രവർത്തിച്ച പരിചയം റോജിക്കുണ്ട്. തെരഞ്ഞെടുപ്പിന്റെ ഭാഗമായി സംസ്ഥാന തല വാർ റൂം ടീമിനെ കോൺഗ്രസ് തെരഞ്ഞെടുത്തിരുന്നു. കോൺഗ്രസ് സംസ്ഥാന സമിതിയുടെ വാർ റൂമിന്റെ ചെയർമാനായി ശശികാന്ത് സെന്തിലിനെ തെരഞ്ഞെടുത്തു. തെരഞ്ഞെടുപ്പ് തന്ത്രജ്ഞൻ സുനിൽ കനുഗോലു വാർ റൂമിന്റ മേൽനോട്ടം നിർവഹിക്കും.കമ്മ്യൂണിക്കേഷൻ വിഭാഗത്തിലേക്ക് നിയോഗിച്ച നേതാക്കളുടെ നിയമനത്തിനും എഐസിസി അംഗീകാരം നൽകി.
