റോം: ആശുപത്രി ജോലിയിൽ പ്രവേശിച്ച ഉടൻ ലീവെടുത്ത് നാല് കോടിയിലധികം രൂപ ശമ്പളം കൈപ്പറ്റിയ 67 കാരൻ അറസ്റ്റിൽ. ഇറ്റലിയിലെ ആശുപത്രിയിലാണ് സംഭവം. 15 വർഷമാണ് ഇയാൾ അധികൃതരെ കബളിപ്പിച്ച് ശമ്പളം വാങ്ങിയത്. ജോലി ഉണ്ടായിട്ടും ഇയാൾ 15 വർഷത്തിനിടയ്ക്ക് ഒരു ദിവസം പോലും ജോലിയിൽ ഹാജരായിട്ടില്ലെന്ന് പൊലീസ് പറയുന്നു. എന്നാൽ മാസാമാസം ശമ്പളം ലഭിക്കുന്നുണ്ടെന്ന് ഉറപ്പുവരുത്തുകയും ചെയ്തിരുന്നു.
2005ലാണ് കാറ്റന്‍സാരോയിലെ ആശുപത്രിയില്‍ സ്‌കുമസ് ജോലിയ്ക്കെത്തിയത്. എന്നാല്‍ 2005 മുതല്‍ 2020 വരെ ഇയാള്‍ ജോലിയില്‍ പ്രവേശിക്കാതെ ശമ്പളം വാങ്ങി. 5,38,999 യൂറോ (ഏകദേശം 4,86,53,028 രൂപ)യാണ് ഇയാള്‍ കൈപ്പറ്റിയതെന്ന് പൊലീസ് നടത്തിയ അന്വേഷണത്തില്‍ കണ്ടെത്തി. സ്‌കുമസിനെതിരെ തട്ടിപ്പ്, കൊള്ളയടി, ഭീഷണിപ്പെടുത്തല്‍, ഔദ്യോഗിക കാര്യങ്ങളുടെ ദുരുപയോഗം എന്നീ കുറ്റങ്ങള്‍ ചുമത്തി അന്വേഷണം ആരംഭിച്ചതായി പൊലീസ് അറിയിച്ചു.
ആശുപത്രിയിലെ ഡയറക്ടറെ ഭീഷണിപ്പെടുത്തിയാണ് ഇയാള്‍ ശമ്പളം വാങ്ങിയിരുന്നത്. ഡയറക്ടര്‍ ഇയാള്‍ക്കെതിരെ റിപ്പോര്‍ട്ട് നല്‍കാതിരിക്കാനായിരുന്നു ഭീഷണിപ്പെടുത്തല്‍ ആശുപത്രിയിലെ നിരവധി പേരില്‍ നിന്നും ലഭിച്ച പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് ഇയാള്‍ കുടുങ്ങുന്നത്. ഇയാള്‍ക്ക് വ്യാജ രേഖ നിര്‍മ്മിച്ച് നല്‍കിയതിന് ആശുപത്രിയിലെ നാല് ജീവനക്കാര്‍ക്കെതിരെയും കേസ് രജിസ്റ്റര്‍ ചെയ്തിട്ടുണ്ട്.
