ചിയാന്‍ വിക്രം വീണ്ടും ആറുസ്വാമി ഐപിഎസ് ആയി എത്തുന്ന ചിത്രമാണ് സാമി സ്‌ക്വയര്‍. 2003ല്‍ വിക്രമും, തൃഷയും നായികാ നായകന്മാരായെത്തിയ മെഗാഹിറ്റ് ചിത്രമായ സ്വാമിയുടെ രണ്ടാം ഭാഗമാണ് സ്വാമി സ്‌ക്വയര്‍. ഹരിയാണ് ചിത്രം സംവിധാനം ചെയ്യുന്നത്. കീര്‍ത്തി സുരേഷാണ് ചിത്രത്തില്‍ വിക്രമിന്റെ നായിക.
അതിനിടയിലാണ് സ്വാമി സ്‌ക്വയറിന്റെ വമ്പന്‍ സര്‍പ്രൈസ് അണിയറപ്രവര്‍ത്തകര്‍ തന്നെ പുറത്തുവിട്ടത്. വിക്രവും കീര്‍ത്തിസുരേഷും ചേര്‍ന്ന് മനോഹരമായി പാടുന്ന ഗാനമാണ് പുറത്തുവിട്ടത്. ദേവീ ശ്രീ പ്രസാദാണ് രചനയും സംഗീതവും നിര്‍വഹിച്ചിരിക്കുന്നത്. പെണ്ണേ ഉന്ന പാത്താല്‍ എന്ന ഗാനമാണ് പുറത്തുവിട്ടിരിക്കുന്നത്.
ചിത്രത്തിന്റെ രണ്ടാം ഭാഗത്തില്‍ വിക്രം ഡബിള്‍ റോളിലാണ് എത്തുന്നത്. മകനായെത്തുന്ന വിക്രമും പൊലീസ് ഓഫീസറുടെ വേഷമാണ് കൈകാര്യം ചെയ്യുന്നത്. പെരുമാള്‍ പിച്ചെയുടെ മക്കളായി ബോബി സിംഹ, ഒഎകെ സുന്ദര്‍, ജോണ്‍ വിജയ് എന്നിവരെത്തുന്നു.
തമിഴ് പ്രേക്ഷകര്‍ ഏറെ ആവേശത്തോടെ കാത്തിരിക്കുന്ന ചിത്രമാണ് സ്വാമി സ്‌ക്വയര്‍. ചിത്രം വമ്പന്‍ ഹിറ്റായിരിക്കുമെന്നാണ് ആരാധകരുടെ പ്രതീക്ഷ. ഡല്‍ഹി, നോയിഡ, ആഗ്ര, ജയ്പൂര്‍, നൈനിറ്റാല്‍, കാഠ്മണ്ഡു തുടങ്ങിയ സ്ഥലങ്ങളിലാണ് സ്വാമി സ്‌ക്വയറിന്റെ ഷൂട്ടിങ്ങ് ലൊക്കേഷന്‍. പ്രഭു, ഗണേഷ് സൂരി, ദേവി ശ്രീ പ്രസാദ് തുടങ്ങിയവരും സിനിമയില്‍ അഭിനയിക്കുന്നു.
