കേപ്ടൗണ്‍: ആഗോളതലത്തില്‍ കൊവിഡ് വ്യാപനം ശക്തമായിരിക്കേ വീട്ടില്‍ തന്നെയാണ് കായികതാരങ്ങള്‍ അടക്കമുള്ള പ്രമുഖര്‍. സോഷ്യല്‍ മീഡിയ വഴിയാണ് താരങ്ങള്‍ ആരാധകരുമായി സംവദിക്കുന്നത്. ഏറ്റവും കൂടുതല്‍ ബുദ്ധിമുട്ടിച്ച ബാറ്റ്സ്മാന്മാര്‍ ആരെന്ന ഒരു ആരാധകന്റെ ചോദ്യത്തിന് രണ്ട് ഇന്ത്യന്‍ താരങ്ങളുള്‍പ്പെടെ അഞ്ച് പേരുടെ പേരാണ് ദക്ഷിണാഫ്രിക്കന്‍ ക്രിക്കറ്റ് താരം ഡെയ്ല്‍ സ്റ്റെയ്ന്‍ വെളിപ്പെടുത്തിയത്.
സച്ചിന്‍ ടെന്‍ഡുല്‍ക്കര്‍, രാഹുല്‍ ദ്രാവിഡ് എന്നിവരാണ് സ്റ്റെയ്നിനെ ബുദ്ധിമുട്ടിച്ച ഇന്ത്യന്‍ താരങ്ങള്‍. മുന്‍ ഓസീസ് ക്യാപ്റ്റന്‍ റിക്കി പോണ്ടിംഗ്, വെസ്റ്റ് ഇന്‍ഡീസ് താരം ക്രിസ് ഗെയ്ല്‍, മുന്‍ ഇംഗ്ലണ്ട് താരം കെവിന്‍ പീറ്റേഴ്സണ്‍ എന്നിവരാണ് സ്റ്റെയ്നിന്റെ പട്ടികയില്‍ ഉള്‍പ്പെട്ട മറ്റുതാരങ്ങള്‍.
പോണ്ടിംഗിനാണ് പട്ടികയില്‍ ഒന്നാം സ്ഥാനം. രണ്ടാമതുള്ള സച്ചിന്‍ ഒരു മതിലായിരുന്നുവെന്ന് സ്റ്റെയ്ന്‍ വ്യക്തമാക്കി. ഐപിഎല്ലിന്റെ പുതിയ സീസണില്‍ വിരാട് കോലി നയിക്കുന്ന റോയല്‍ ചാലഞ്ചേഴ്‌സ് ബാംഗ്ലൂരിനായി കളിക്കാന്‍ തയ്യാറെടുക്കുകയാണ് സ്റ്റെയ്ന്‍. എന്നാല്‍ കൊവിഡ് ബാധയെ തുടര്‍ന്ന് ടൂര്‍ണമെന്റ് അനിശ്ചിതകാലത്തേക്ക് നീട്ടിവച്ചിരിക്കുകയാണ്.
