സായി പല്ലവിയുടെ പിറന്നാള്‍ ദിവസം സര്‍പ്രൈസ് ബര്‍ത്ത്‌ഡേ ട്രീറ്റ് ഒരുക്കിയ വീഡിയോ വൈറലാവുന്നു. കഴിഞ്ഞ ദിവസമായിരുന്നു സായി പല്ലവിയുടെ പിറന്നാളാഘോഷം നടന്നത്.മാരീ ടീമായിരുന്നു സര്‍പ്രൈസ് ബര്‍ത്ത്‌ഡേ ട്രീറ്റ് ഒരുക്കിയത്. സായിയുടെ 26-ാം പിറന്നാളായിരുന്നു മാരി 2 ടീംസ് നടത്തിയിരുന്നത്.
തറലോക്കല്‍ പിറന്നാള്‍ ആശംസകള്‍ സായി പല്ലവി എന്നായിരുന്നു ബെര്‍ത്ത് ഡേ കേക്കില്‍ ടീം എഴുതിയിരുന്നത്. സായിക്കൊപ്പം സഹതാരം വിനോദിന്റെയും പിറന്നാള്‍ സെറ്റില്‍ അണിയറപ്രവര്‍ത്തകര്‍ ആഘോഷിച്ചു.സായിയുടെ പിറന്നാള്‍ ചിത്രങ്ങള്‍ സമൂഹമാധ്യമങ്ങളില്‍ വൈറലായിരിക്കുകയാണ്.
പ്രേമം എന്ന ഒറ്റ ചിത്രത്തിലൂടെ മലയാളി പ്രേക്ഷകരുടെ മനസ് കീഴടക്കിയ താരമാണ് സായി പല്ലവി. തമിഴിലും തെലുങ്കിലുമായിട്ടാണ് ഇപ്പോള്‍ സായിയുടെ കൂടുതല്‍ ചിത്രങ്ങളും പുറത്തിറങ്ങുന്നത്. ധനുഷിനൊപ്പമുളള മാരി 2 എന്ന ചിത്രത്തിലാണ് നടി ഇപ്പോള്‍ അഭിനയിച്ചുകൊണ്ടിരിക്കുന്നത്.
ധനുഷിന്റെ നായികയായി സായി പല്ലവി ആദ്യമായി എത്തുന്ന ചിത്രമാണ് മാരി 2. ബാലാജി മോഹന്‍ സംവിധാനം ചെയ്യുന്ന ഈ ചിത്രത്തില്‍ നടന്‍ ടൊവിനോ തോമസാണ് വില്ലനായി എത്തുന്നത്. ധനുഷിന്റെ തന്നെ സൂപ്പര്‍ഹിറ്റ് ചിത്രമായ മാരിയുടെ രണ്ടാം ഭാഗത്തിനായി ആവേശത്തോടെയാണ് ആരാധകര്‍ കാത്തിരിക്കുന്നത്.
ചിത്രത്തില്‍ ധനുഷിന്റെയും സായിയുടെയും പ്രകടനമാണ് എല്ലാവരും ഉറ്റുനോക്കുന്നത്. വണ്ടര്‍ബാര്‍ ഫിലിംസിന്റെ ബാനറില്‍ ധനുഷ് തന്നെയാണ് ഈ ചിത്രം നിര്‍മ്മിച്ചിരിക്കുന്നത്. യുവന്‍ ശങ്കര്‍ രാജയാണ് ചിത്രത്തിനു വേണ്ടി സംഗീതമൊരുക്കുന്നത്. മാരി 2വിന്റെ ചിത്രീകരണം പുരോഗമിച്ചുകൊണ്ടിരിക്കുകയാണ്
