വോള്‍ഗോഗ്രാഡ്: സൗദി അറേബ്യയോടും അടിയറവ് പറഞ്ഞ് ഈജിപ്തിന് ദയനീയ മടക്കം. ഒന്നിനെതിരെ രണ്ടു ഗോളുകള്‍ക്കാണ് സൗദിയുടെ വിജയം.
ഈജിപ്ഷ്യന്‍ സൂപ്പര്‍താരം മുഹമ്മദ് സലാ നേടിയ ഗോളില്‍ ആദ്യം മുന്നില്‍ക്കയറിയ ഈജിപ്തിനെ രണ്ടു ഗോള്‍ തിരിച്ചടിച്ചാണ് സൗദി തോല്‍പ്പിച്ചത്. ഇരുപകുതികളുടെയും ഇന്‍ജുറി ടൈമിലായിരുന്നു സൗദിയുടെ ഗോളുകള്‍. ഇതിനിടെ ഒരു പെനല്‍റ്റി സൗദി പാഴാക്കുകയും ചെയ്തു.
എന്നിരുന്നാലും, ഗ്രൂപ്പില്‍ മൂന്നാം സ്ഥാനക്കാരായി സൗദിക്കും അവസാന സ്ഥാനക്കാരായി ഈജിപ്തിനും നാടുകളിലേക്കു മടങ്ങാം. നേരത്തെ തന്നെ ലോകകപ്പില്‍നിന്ന് പുറത്തായ ഇവരുടെ ഗ്രൂപ്പില്‍ നിന്ന് യുറഗ്വായും റഷ്യയുമാണ് നോക്കൗട്ടിലേക്ക് മുന്നേറിയത്. ഗ്രൂപ്പിലെ അവസാന മല്‍സരത്തില്‍ റഷ്യയെ തോല്‍പ്പിച്ച യുറഗ്വായ് ഗ്രൂപ്പു ചാമ്പ്യന്‍മാരായാണ് പ്രീക്വാര്‍ട്ടറില്‍ കടന്നത്.
ഒരു മല്‍സരം പോലും ജയിക്കാനായില്ലെങ്കിലും സ്വന്തം പേരില്‍ രണ്ടു ഗോളുകള്‍ കുറിച്ചാണ് സലാ റഷ്യയില്‍നിന്ന് മടങ്ങുന്നത്.
