ജിദ്ദ: ഈ വര്‍ഷത്തെ ഹജ്ജിന് വേണ്ടിയുള്ള ഓണ്‍ലൈന്‍ രജിസ്‌ട്രേഷന്‍ അവസാനിച്ചതോടെ 5.4 ലക്ഷം അപേക്ഷകള്‍ ലഭിച്ചതായി സൗദി ഹജ്ജ് ഉംറ മന്ത്രാലയം അറിയിച്ചു. കൊവിഡിന്റെ പശ്ചാത്തലത്തില്‍ സ്വദേശികളും വിദേശികളുമടക്കം ഇത്തവണ ഹജ്ജ് ചെയ്യാന്‍ അവസരം ലഭിക്കുന്ന 60,000 പേരെ ഇതില്‍ നിന്ന് നറുക്കെടുപ്പിലൂടെ തെരഞ്ഞെടുക്കും. ഇവരുടെ പട്ടിക വെള്ളിയാഴ്ച പ്രസിദ്ധീകരിക്കുമെന്നും മന്ത്രാലയം അധികൃതര്‍ വ്യക്തമാക്കി. ഇവര്‍ക്ക് വെള്ളിയാഴ്ച ഉച്ചയ്ക്കു ശേഷം ഒരു മണി മുതല്‍ പാക്കേജുകള്‍ തെരഞ്ഞെടുക്കാം.
രജിസ്റ്റര്‍ ചെയ്തവരില്‍ 59 ശതമാനം പുരുഷന്‍മാരാണ്. 31നും 40നും ഇടയില്‍ പ്രായമുള്ളവരാണ് ഏറ്റവും കൂടുതല്‍- 38 ശതമാനം. 60നും 65നും ഇടയില്‍ പ്രായമുള്ളവരാണ് ഏറ്റവും കുറവ്. ഈ പ്രായത്തിനിടയിലുള്ളവര്‍ വെറും രണ്ട് ശതമാനം മാത്രമാണെന്നും മന്ത്രാലയം അറിയിച്ചു. അപേക്ഷകരില്‍ സൗദിയിലുള്ള സ്വദേശികളും വിദേശികളും ഉള്‍പ്പെടും. 18നും 65നും ഇടയില്‍ പ്രായമുള്ളവര്‍ക്ക് മാത്രമാണ് ഇത്തവണ ഹജ്ജിന് അവസരമുള്ളത്. വാക്സിന് എടുത്തവരും ആരോഗ്യവാന്‍മാരും ആയിരിക്കണമെന്ന നിബന്ധനയുമുണ്ട്.
ജീവിതത്തില്‍ ആദ്യമായി ഹജ്ജിന് അപേക്ഷ നല്‍കുന്നവര്‍ക്ക് മുന്‍ഗണന നല്‍കും. കഴിഞ്ഞ അഞ്ച് വര്‍ഷത്തിനിടയില്‍ ഹജ്ജ് ചെയ്തവര്‍ക്ക് അവസരം നല്‍കില്ലെന്ന് നേരത്തേ അധികൃതര്‍ വ്യക്തമാക്കിയിരുന്നു. സൗദിക്കു പുറത്തു നിന്ന് വരുന്നവര്‍ക്ക് ഇത്തവണ ഹജ്ജിന് അനുമതി നല്‍കേണ്ടെന്ന് മന്ത്രാലയം നേരത്തേ തീരുമാനിച്ചിരുന്നു.
അതേസമയം, ഹജ്ജിന് തിരഞ്ഞെടുക്കപ്പട്ടവര്‍ മൂന്ന് മണിക്കൂറിനകം പണമടച്ച് ബുക്കിംഗ് പൂര്‍ത്തിയാക്കണമെന്ന് ഹജ്ജ്-ഉംറ കാര്യ മന്ത്രാലയം നേരത്തേ അറിയിച്ചിരുന്നു. നിശ്ചിത മണിക്കൂറിനകം പണമടക്കാത്തവരുടെ രജിസ്‌ട്രേഷന്‍ മാറ്റിനിര്‍ത്തി ക്രമപ്രകാരമുള്ള അടുത്ത ആളുകള്‍ക്ക് അവസരം നല്‍കും. പണമടച്ച് രജിസ്‌ട്രേഷന്‍ പൂര്‍ത്തിയാക്കിയവരുടെ ഹജ്ജ് അനുമതിപത്രം വ്യക്തിഗത പോര്‍ട്ടലായ അബ്ഷിറില്‍ ലഭ്യമാക്കും.
