റിയാദ്: കൊവിഡ് വാക്സിനേഷന് സര്‍ട്ടിഫിക്കറ്റ് രജിസ്റ്റര്‍ ചെയ്യാന്‍ സൗദി ആരോഗ്യമന്ത്രാലയത്തിന്റെ ഇ സര്‍വീസസ് പോര്‍ട്ടലില്‍ സൗദി കോണ്‍സുലേറ്റിന്റെ അറ്റസ്റ്റേഷന്‍ ആവശ്യമില്ലെന്ന് ഇന്ത്യന്‍ എംബസി വ്യക്തമാക്കി.
ഇന്ത്യയില്‍ നിന്ന് ലഭിക്കുന്ന എല്ലാ കൊവിഡ് സര്‍ട്ടിഫിക്കറ്റുകളിലും ക്യുആര്‍ കോഡ് രജിസ്ട്രേഷനുണ്ടെന്നും അതുവഴി ആധികാരിത ഉറപ്പിക്കാനാവുമെന്നും എംബസി പ്രസ്താവനയില്‍ വ്യക്തമാക്കി. ഇക്കാര്യം സൗദി ആരോഗ്യ മന്ത്രാലയത്തെ ബോധ്യപ്പെടുത്തിയിട്ടുണ്ടെന്നും എംബസി അറിയിച്ചു.
വിദേശ രാജ്യങ്ങളില്‍ നിന്ന് വാക്സിന്‍ എടുത്തവര്‍ക്ക് സൗദിയില്‍ പ്രവേശിക്കണമെങ്കില്‍ വാക്സിനേഷന് വിവരങ്ങള്‍ സൗദിയുടെ മുഖീം പോര്‍ട്ടലിലും തവക്കല്‍നാ ആപ്ലിക്കേഷനിലും അപ്ഡേറ്റ് ആവാന്‍ സൗദി ആരോഗ്യ മന്ത്രാലയത്തിന്റെ വെബ്സൈറ്റിലെ ഇ സര്‍വീസസില്‍ രജിസ്റ്റര്‍ ചെയ്യണമെന്നാണ് നിയമം.
എന്നാല്‍ ആരോഗ്യ മന്ത്രാലയത്തിന്റെ സൈറ്റില്‍ രജിസ്റ്റര്‍ ചെയ്ത പലര്‍ക്കും വാക്സിനേഷന് സര്‍ട്ടിഫിക്കറ്റ് സൗദി കോണ്‍സുലേറ്റ് അറ്റസ്റ്റ് ചെയ്തിട്ടില്ല എന്ന കാരണത്താല്‍ രജിസ്‌ട്രേഷനുള്ള അപേക്ഷ നിരസിക്കുകയാണെന്ന് കാണിച്ച് കഴിഞ്ഞ ദിവസങ്ങളില്‍ സന്ദേശമെത്തിയിരുന്നു. ഇതേ തുടര്‍ന്ന് സര്‍ട്ടിഫിക്കറ്റ് അറ്റസ്റ്റ് ചെയ്യാന്‍ പലരും ട്രാവല്‍ ഏജന്‍സികളെ സമീപിക്കുകയും ചെയ്തു. 9000 രൂപ വരെയാണ് ഇതിന് ചാര്‍ജായി ഏജന്‍സികള്‍ അറിയിച്ചത്.
