തിരുവനന്തപുരം: പണിമുടക്കിനിടെ തിരുവനന്തപുരത്ത് എസ്ബി ഐ ബ്രാഞ്ച് ആക്രമിച്ച കേസില്‍ എന്‍ജിഒയുടെ പ്രധാന നേതാക്കളെ തിരിച്ചറിഞ്ഞിട്ടില്ലെന്ന് പൊലീസ്.
അതേസമയം, എസ്ബിഐയുടെ ട്രഷറി ബ്രാഞ്ച് ആക്രമിച്ച കേസ് ഒത്തുതീര്‍പ്പാക്കുവാന്‍ ഉദ്ദേശിക്കുന്നില്ലെന്ന് മാനേജര്‍ സന്തോഷ് കരുണാകരന്‍ പറഞ്ഞിരുന്നു. ഒത്തുതീര്‍പ്പിന് തങ്ങളെ ആരും സമീപിച്ചിട്ടില്ലെന്നും മുതിര്‍ന്ന ഉദ്യോഗസ്ഥര്‍ കേസില്‍ തുടര്‍ നടപടി സ്വീകരിക്കുമെന്നും മാനേജര്‍ വ്യക്തമാക്കിയിട്ടുണ്ട്.
കേസുമായി ബന്ധപ്പെട്ട് അശോകന്‍, ഹരിലാല്‍ എന്നിവരെയാണ് പൊലീസ് അറസ്റ്റ് ചെയ്തത്. തിരുവനന്തപുരം കന്റോണ്‍മെന്റ് പൊലീസാണ് ഇവരെ അറസ്റ്റ് ചെയ്തത്.
എസ്ബിഐയുടെ ട്രഷറി ബ്രാഞ്ചില്‍ ആക്രമണം നടത്തിയ സംഭവത്തില്‍ കണ്ടാലറിയാവുന്ന 15 പേര്‍ക്കെതിരെ പൊലീസ് കേസെടുത്തിരുന്നു. ജാമ്യമില്ലാ വകുപ്പുകള്‍ ചുമത്തിയാണ് കന്റോണ്‍മെന്റ് പൊലീസ് കേസെടുത്തത്. പൊതുമുതല്‍ നശിപ്പിച്ചതടക്കം ഏഴു വകുപ്പുകള്‍ പ്രതികള്‍ക്കെതിരെ ചുമത്തിയിട്ടുണ്ട്.
