കൊളംബോ: ശ്രീലങ്കയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ദക്ഷിണാഫ്രിക്കയ്ക്ക് കൂറ്റന്‍ വിജയലക്ഷ്യം. 490 റണ്‍സിന്റെ വിജയലക്ഷ്യമാണ് ലങ്ക ദക്ഷിണാഫ്രിക്കയ്ക്ക് മുന്നില്‍ വെച്ചിരിക്കുന്നത്. രണ്ടാം ഇന്നിംഗ്‌സില്‍ അഞ്ച് വിക്കറ്റിന് 275 റണ്‍സെന്ന നിലയ്ക്കാണ് ശ്രീലങ്ക ഡിക്ലയേര്‍ഡ് ചെയ്തത്.
ശ്രീലങ്കയ്ക്കു വേണ്ടി രണ്ടാം ഇന്നിംഗ്‌സില്‍ ദിമുത് കരുണരത്‌നെ (85), എയ്ഞ്ചലോ മാത്യൂസ് (71), ധനുഷ്‌ക ഗുണതിലക (61) എന്നിവര്‍ അര്‍ധ സെഞ്ച്വറിയുമായി തിളങ്ങി. ദക്ഷിണാഫ്രിക്കയ്ക്കു വേണ്ടി കേശവ് മഹാരാജ് മൂന്ന് വിക്കറ്റ് വീഴ്ത്തി. ഇതോടെ രണ്ട് ഇന്നിംഗ്‌സിലായി താരം 12 വിക്കറ്റുകള്‍ സ്വന്തമാക്കി. ആദ്യ ഇന്നിംഗ്‌സില്‍ 338 റണ്‍സെടുത്ത ശ്രീലങ്ക ദക്ഷിണാഫ്രിക്കയെ 124 റണ്‍സിന് ഓള്‍ ഔട്ടാക്കുകയായിരുന്നു.
