ന്യൂഡല്‍ഹി: ഇന്ത്യയുടെ ഒളിമ്പിക്‌സ് സ്വര്‍ണ മെഡല്‍ ജേതാവ് നീരജ് ചോപ്രയെ കലശലായ പനിയെ തുടര്‍ന്ന് ആശുപത്രിയില്‍ പ്രവേശിപ്പിച്ചു. ചൊവ്വാഴ്ച പാനിപ്പത്തില്‍ സംഘടിപ്പിച്ച സ്വീകരണ പരിപാടിക്കിടെ നീരജ് ചോപ്രക്ക് പനി വര്‍ധിക്കുകയും ആശുപത്രിയില്‍ പ്രവേശിപ്പിക്കുകയുമായിരുന്നു.
പാനിപ്പത്തിലെ ചടങ്ങിനിടെ ദേഹാസ്വാസ്ഥ്യത്തെ തുടര്‍ന്ന് നീരജ് വേദിയില്‍ നിന്ന് ഇറങ്ങുകയായിരുന്നു. തുടര്‍ന്നാണ് ആശുപത്രിയില്‍ പ്രവേശിപ്പിച്ചത്. ഡല്‍ഹിയില്‍ നിന്ന് ആരംഭിച്ച കാര്‍ റാലിയില്‍ പങ്കെടുത്ത് ആറു മണിക്കൂര്‍ കൊണ്ടാണ് നീരജ് പാനിപ്പത്തിലെത്തിയത്.
പാനിപ്പത്തില്‍ നിന്ന് പതിനഞ്ചു കിലോമീറ്റര്‍ അകലെയാണ് നീരജിന്റെ ജന്മനാട്. കുറച്ച് ദിവസങ്ങള്‍ക്കു മുമ്പുതന്നെ നീരജിന് പനി ഉണ്ടായിരുന്നെങ്കിലും കോവിഡ് നെഗറ്റീവായിരുന്നു. തുടര്‍ന്ന് ഞായറാഴ്ച നടന്ന സ്വാതന്ത്ര്യദിനാഘോഷത്തില്‍ പ്രധാനമന്ത്രിക്കൊപ്പം പങ്കെടുക്കുകയും ചെയ്തിരുന്നു.
