കൊല്ലം : കൊല്ലം എസ് എന്‍ കോളേജില്‍ എസ്എഫ്‌ഐ -എബിവിപി സംഘര്‍ഷം. പൊലീസ് സ്ഥലത്തെത്തിയിട്ടുണ്ട്.
സിഐ അടക്കം അന്‍പതോളം പൊലീസുകാര്‍ നോക്കി നില്‍ക്കെയായിരുന്നു സ്റ്റേഷന്‍ വളപ്പില്‍ വച്ച് എസ്എഫ്‌ഐ അതിക്രമം. കൊല്ലം ഈസ്റ്റ് പൊലീസ് സ്റ്റേഷനില്‍ വച്ച് എസ്എഫ്‌ഐ പ്രവര്‍ത്തകര്‍ എബിവിപി പ്രവര്‍ത്തകന്റെ തല അടിച്ചു പൊട്ടിച്ചത്.
എബിവിപി സജീവ പ്രവര്‍ത്തകനും എസ്എന്‍ കോളേജിലെ നിയമവിദ്യാര്‍ത്ഥിയുമായ അജിത്തിനാണ് മര്‍ദ്ദനമേറ്റത്. ഇയാളെ ഇപ്പോള്‍ ജില്ലാ ആശുപത്രിയില്‍ പ്രവേശിപ്പിച്ചിരിക്കുകയാണ്.
രാവിലെ മുതല്‍ കൊല്ലം എസ്എന്‍ ലോ കോളേജില്‍ സംഘര്‍ഷാവസ്തയായിരുന്നു. കോളേജില്‍ എബിവിപി യൂണിറ്റ് രൂപീകരിക്കാനുള്ള ശ്രമം എസ്എഫ്‌ഐ തടഞ്ഞതോടെയാണ് സംഘര്‍ഷം തുടങ്ങിയത്. അക്രമം തടയുവാന്‍ എത്തിയ പോലീസിനു നേരെയും എസ്എഫ്‌ഐ ആക്രമണം അഴിച്ചുവിട്ടു. എസ്‌ഐ അടക്കമുള്ളവരുടെ കൈക്ക് പരിക്കേറ്റിരുന്നു. സംഭവം അക്രമാസക്തമായതോടെ നാല് എസ്എഫ്‌ഐ പ്രവര്‍ത്തകരെ പൊലീസ് അറസ്റ്റ് ചെയ്തിരുന്നു.
അറസ്റ്റ് ചെയ്തവരെ വിട്ടുകിട്ടണമെന്ന് ആവശ്യപ്പെട്ട് എസ്എഫ്‌ഐ പ്രവര്‍ത്തകര്‍ സ്റ്റേഷന്‍ വളഞ്ഞിരുന്നു. അപ്പോഴാണ് പരാതി നല്‍കാനായി അജിത്തും സംഖവും സ്റ്റേഷനില്‍ എത്തിയത്. ഇവരെ കണ്ട എസ്എഫ്‌ഐ പ്രവര്‍ത്തകര്‍ യാതൊരു പ്രകോപനവുമില്ലാതെ വളഞ്ഞിട്ട് ആക്രമിക്കുകയായിരുന്നു.
