ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ആസ്റ്റണ്‍ വില്ലയുടെ തേരോട്ടത്തെ പിടിച്ചുനിര്‍ത്തി ഷെഫീല്‍ഡ് യുണൈറ്റഡ്. പോയിന്റ് ടേബിളില്‍ ഒന്നാമതെത്താനുള്ള ആസ്റ്റണ്‍ വില്ലയുടെ മോഹങ്ങള്‍ക്കാണ് തിരിച്ചടിയേറ്റത്. മത്സരത്തില്‍ ഇരു ടീമുകളും ഓരോ ഗോള്‍ വീതം നേടി. ആസ്റ്റണ്‍ വില്ലയുടെ ഹോം സ്റ്റേഡിയത്തിലാണ് മത്സരം നടന്നത്. പക്ഷേ പോയിന്റ് ടേബിളില്‍ അവസാന സ്ഥാനക്കാരായിരുന്ന ഷെഫീല്‍ഡ് യുണൈറ്റഡിനെ തോല്‍പ്പിക്കാന്‍ ആസ്റ്റണ്‍ വില്ലയ്ക്ക് കഴിഞ്ഞില്ല.
പ്രീമിയര്‍ ലീഗില്‍ 18 മത്സരങ്ങള്‍ പൂര്‍ത്തിയാക്കിയ ആസ്റ്റണ്‍ വില്ല 39 പോയിന്റ് നേടിയിട്ടുണ്ട്. 17 മത്സരങ്ങളില്‍ നിന്ന് 39 പോയിന്റുള്ള ആഴ്‌സണലാണ് ഒന്നാം സ്ഥാനത്ത്. 18 മത്സരങ്ങളില്‍ ഒമ്പത് പോയിന്റുള്ള ഷെഫീല്‍ഡ് യുണൈറ്റഡ് ഒമ്പതാം സ്ഥാനത്താണ്.
മത്സരത്തിന്റെ 78 ശതമാനവും പന്തിനെ നിയന്ത്രിച്ചത് ആസ്റ്റണ്‍ വില്ലയായിരുന്നു. പക്ഷേ സന്ദര്‍ശകരുടെ പ്രതിരോധക്കോട്ട തകര്‍ക്കാന്‍ വില്ലയ്ക്ക് കഴിഞ്ഞില്ല. മത്സരത്തിന്റെ 87-ാം മിനിറ്റില്‍ കാമറൂണ്‍ ആര്‍ച്ചറിലൂടെ ഷെഫീല്‍ഡ് യുണൈറ്റഡ് മുന്നിലെത്തി. ഇഞ്ചുറി ടൈമില്‍ 97-ാം മിനിറ്റിലാണ് ആസ്റ്റണ്‍ വില്ല തോല്‍വി ഒഴിവാക്കിയത്. നിക്കോളോ സനിയോളോയിലുടെ വില്ല സമനില പിടിച്ചു.
