മാര്‍ച്ച് 23ന് ഐപിഎല്ലിന് തിരശ്ശീല ഉയുമ്പോള്‍ ആരാധകര്‍ ഏറെ ശ്രദ്ധയോടെ വീക്ഷിക്കുന്ന ഒരു താരമാണ് യുവരാജ് സിങ്. ലേലത്തിന്റെ അവസാന ഘട്ടത്തിലാണ് യുവിയെ മുംബൈ ഇന്ത്യന്‍സ് സ്വന്തമാക്കിയത്.
ഇതിനിടെ യുവിയും ഡല്‍ഹി താരം ശിഖര്‍ ധവാനും തമ്മിലുള്ള ട്വിറ്ററിലെ സംസാരം ആരാധകരുടെ ശ്രദ്ധ നേടുകയാണ്. ഡല്‍ഹിയുടെ പരിശീലനത്തിനിടെ എടുത്ത ഗാംഗുലിക്കൊപ്പമുള്ള ചിത്രം ധവാന്‍ കഴിഞ്ഞ ദിവസം പോസ്റ്റ് ചെയ്തിരുന്നു. ഇവിടെ നിന്നുമാണ് തുടക്കം. ദാദ തന്നോട് എന്താണ് പറയുന്നത് എന്നായിരുന്നു ധവാന്റെ ചോദ്യം. ഇതിന് രസകരമായ മറുപടിയാണ് യുവി നല്‍കിയത്.
നീ ഐപിഎല്ലില്‍ പന്തെറിയുന്നുണ്ടെങ്കില്‍ ഫുള്‍ സ്ലീവ് ടിഷര്‍ട്ട് ധരിക്കണമെന്നാണ് ദാദ പറയുന്നത് എന്നായിരുന്നു യുവിയുടെ മറുപടി. ഉടനെ തന്നെ ധവാന്റെ പ്രതികരണവുമെത്തി. താന്‍ ബോളിങില്‍ നിന്നും വിരമിച്ച കാര്യം ഗാംഗുലിക്ക് അറിയില്ലെന്ന് തോന്നുന്നു എന്നായിരുന്നു ധവാന്റെ മറുപടി. ഇരുവരും നേരത്തെ സണ്‍റൈസേഴ്സ് ഹൈദരാബാദിന്റെ താരങ്ങളായിരുന്നു.
