ദക്ഷിണാഫ്രിക്ക: ഇന്ത്യ-ദക്ഷിണാഫ്രിക്ക രണ്ടാം ടെസ്റ്റില്‍ നിന്ന് ശിഖര്‍ ധവാനെ ഒഴിവാക്കാന്‍ സാധ്യത. കഴിഞ്ഞ മത്സരത്തില്‍ ധവാന്റെ പ്രകടനം മോശമായിരുന്നു എന്നതിന്റെ അടിസ്ഥാനത്തിലാണ് ധവാനെ ഒഴിവാക്കുന്നത് എന്ന് അധികൃതര്‍ പറയുന്നു.
അതേസമയം, രാഹുല്‍, രഹാനെ എന്നിവരെ ഒഴിവാക്കിയാണ് ധവാന്‍, രോഹിത് ശര്‍മ്മ എന്നിവരെ മത്സരത്തിനിറക്കിയത്. എന്നാല്‍ ധവാനെ ടീമിലെടുത്ത ഇന്ത്യന്‍ നായകന്‍ വിരാട് കൊഹ്‌ലിയ്‌ക്കെതിരെ വിമര്‍ശനങ്ങള്‍ ഉണ്ട്.
കൊഹ്‌ലിയുടെ ഇഷ്ടപ്രകാരമാണ് ഇരുവരും ടീമില്‍ എത്തിയതെന്നും മോശം പ്രകടനമാണ് ഇരുവരും കാഴ്ച വെച്ചതെന്നും സൗരവ് ഗാംഗുലി ഉള്‍പ്പെടെയുള്ളവര്‍ വിമര്‍ശിച്ചു. അതേസമയം രഹാനെയ്‌ക്കൊപ്പം അശ്വിനെയും ടീമിലെടുക്കണമെന്നായിരുന്നു വീരേന്ദര്‍ സേവാഗിന്റെ ആവശ്യം.
രാഹുല്‍, രഹാനെ എന്നിവര്‍ക്കൊപ്പം ഇഷാന്ത് ശര്‍മ്മയേയും ടീമിലെത്തിക്കാനുള്ള നീക്കത്തിലാണ് മാനേജ്‌മെന്റ്‌. ജനുവരി 13നാണ് ഇന്ത്യ-ദക്ഷിണാഫ്രിക്ക പരമ്പരയിലെ രണ്ടാം ടെസ്റ്റ് മല്‍സരം തുടങ്ങുന്നത്. ആദ്യ ടെസ്റ്റില്‍ ദക്ഷിണാഫ്രിക്ക 72 റണ്‍സിന് ഇന്ത്യയെ തോല്‍പ്പിച്ചിരുന്നു.
