ന്യൂഡല്‍ഹി: കര്‍ണാടക മുഖ്യമന്ത്രിയായാല്‍ അമുല്‍ പാല്‍ വാങ്ങരുതെന്ന് ജനങ്ങളോട് ആവശ്യപ്പെടുമെന്ന് മുതിര്‍ന്ന കോണ്‍ഗ്രസ് നേതാവ് സിദ്ധരാമയ്യ. ഗുജറാത്ത് ആസ്ഥാനമായുള്ള ക്ഷീര സഹകരണ സ്ഥാപനമായ അമുലും കര്‍ണാടക ആസ്ഥാനമായുള്ള നന്ദിനിയും തമ്മിലുള്ള ലയനം ഒഴിവാക്കാനാണ് ഈ തീരുമാനമെന്ന് അദ്ദേഹം പറഞ്ഞു. അമുല്‍ അതിന്റെ നിലവിലെ ഉപഭോക്തൃ അടിത്തറയില്‍ ഉറച്ചുനില്‍ക്കണം. കര്‍ണാടകയില്‍ വന്ന് അമുല്‍ പ്രാദേശിക കര്‍ഷകരോട് അനീതി കാണിക്കാനാണ് ശ്രമിക്കുന്നത്. അതുകൊണ്ട് തന്നെ അമുലിന്റെ പ്രവേശനത്തെ എതിര്‍ക്കും. താന്‍ മുഖ്യമന്ത്രിയായാല്‍ അമുല്‍ പാല്‍ വാങ്ങരുതെന്ന് താന്‍ ജനങ്ങളോട് ആവശ്യപ്പെടുമെന്നും ഇന്ത്യ ടുഡേ കര്‍ണാടക റൗണ്ട് ടേബിള്‍ 2023ല്‍ ശനിയാഴ്ച സംസാരിക്കവെ മുന്‍ കര്‍ണാടക മുഖ്യമന്ത്രി സിദ്ധരാമയ്യ വ്യക്തമാക്കി.
ടിപ്പു ജയന്തി അധികാരത്തിലെത്തിയ ശേഷം പുനഃസ്ഥാപിക്കുമോയെന്ന ചോദ്യത്തിന്, താന്‍ ഏകാധിപതിയല്ലെന്നും വിഷയത്തില്‍ തീരുമാനമെടുക്കുന്നതിന് മുമ്പ് നിയമസഭാംഗങ്ങളോടും മന്ത്രിസഭയോടും കൂടിയാലോചിക്കുമെന്നും സിദ്ധരാമയ്യ പറഞ്ഞു. വിലക്കയറ്റവും തൊഴിലില്ലായ്മയും മൂലം ജനങ്ങള്‍ ബുദ്ധിമുട്ടുകയാണ്. ജനങ്ങള്‍ക്ക് ബിജെപിയെ മടുത്തുവെന്നും കര്‍ണാടക മാറ്റം ആഗ്രഹിക്കുന്നുണ്ടെന്നും സിദ്ധരാമയ്യ പറഞ്ഞു.
