കൊച്ചി: മുഹമ്മദ് റഫി ഗാനങ്ങളിലൂടെ ശ്രദ്ധേയനായ ഗായകന്‍ കൊച്ചിന്‍ ആസാദ് (62) അന്തരിച്ചു. ഇന്ന് പുലര്‍ച്ചെ നാല് മണിക്ക് ഹൃദയാഘാതം മൂലമായിരുന്നു അന്ത്യം. മൃതദേഹം മട്ടാഞ്ചേരിയിലെ സ്വവസതിയില്‍ സൂക്ഷിച്ചിരിക്കുകയാണ്.
സംഗീത സംവിധായകന്‍ എം ജയചന്ദ്രന്റെ സ്റ്റേജ് ഷോകളില്‍ സ്ഥിരം സാന്നിദ്ധ്യമായിരുന്നു ആസാദ്. റഫി ഗാനങ്ങള്‍ക്ക് പുറമെ പങ്കജുദാസിന്റെ ഗസലുകളും ആസാദിന്റെ സ്റ്റേജ് ഷോകളില്‍ അവതരിപ്പിക്കാറുണ്ട്. കേരള റഫിയെന്നാണ് ഇദ്ദേഹം അറിയപ്പെട്ടിരുന്നത്.
സംസ്‌കാരം ഇന്ന് വൈകീട്ട് മൂന്നിന് പള്ളുരുത്തി തങ്ങള്‍ നഗര്‍ മുഹമ്മദ് പള്ളിയില്‍ നടക്കും. ഭാര്യ- സക്കീന ആസാദ്, മക്കള്‍-നിഷാദ് ആസാദ്, ബിജു ആസാദ്, മരുമക്കള്‍ ഷംജ നിഷാദ്, ഫെമിന ബിജു.
