കൊച്ചി: സ്വര്‍ണക്കടത്ത് കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിനെ കസ്റ്റംസ് വീണ്ടും ചോദ്യം ചെയ്യും. നേരത്തെ ശിവശങ്കറിനെ കസ്റ്റംസ് മണിക്കൂറുകളോളം ചോദ്യം ചെയ്തിരുന്നു. ഈ മൊഴിയില്‍ തൃപ്തിയില്ലാത്തതിനെ തുടര്‍ന്നാണ് വീണ്ടും ചോദ്യം ചെയ്യുന്നത്.
പ്രധാന പ്രതികളില്‍ ഒരാളായ സ്വപ്ന സുരേഷിനെ കസ്റ്റഡിയില്‍ ലഭിച്ച് ചോദ്യം ചെയ്തതിന് ശേഷമാണ് കസ്റ്റംസ് ശിവശങ്കറിനെ ചോദ്യം ചെയ്യുക. നിലവില്‍ എന്‍ഐഎ കസ്റ്റഡിയില്‍ തുടരുന്ന സ്വപ്ന സുരേഷിന്റെ കസ്റ്റഡി കാലാവധി 21 ന് അവസാനിക്കും. ഇതിന് ശേഷമായിരിക്കും കസ്റ്റംസ് കസ്റ്റഡിയില്‍ ഇവരെ ലഭിക്കുക.
നേരത്തെ തിരുവനന്തപുരത്ത് വെച്ചാണ് ശിവശങ്കറിനെ കസ്റ്റംസ് ചോദ്യം ചെയ്തത്. ഈ മൊഴിപ്പകര്‍പ്പ് കൊച്ചിയിലെത്തിച്ച് കസ്റ്റംസ് കമ്മീഷണര്‍ പരിശോധിക്കും. ഇതിന് ശേഷമാണ് സ്വപ്ന സുരേഷിനെ ചോദ്യം ചെയ്യുക.
