മലമ്പുഴ: മലമ്പുഴയില്‍ വിഎസിനെതിരെ പ്രതിഷേധം ശക്തമാക്കുമെന്ന് എസ്എന്‍ഡിപി. മൈക്രോഫിനാന്‍സുമായി ബന്ധപ്പെട്ട് വിഎസ് ആരോപണങ്ങളുന്നയിക്കുന്ന സാഹചര്യത്തിലാണ് അദ്ദേഹം മത്സരിക്കുന്ന മണ്ഡലത്തില്‍ പ്രചരണം നടത്താന്‍ എസ്എന്‍ഡിപി തീരുമാനിച്ചിട്ടുള്ളത്. വിഎസിനെതിരെ പാലക്കാട് പ്രതിഷേധ പ്രകടനവും നടന്നു.
മലമ്പുഴയില്‍ വിഎസിന്റെ പഞ്ചായത്ത് തെരഞ്ഞെടുപ്പ് കണ്‍വെന്‍ഷനുകള്‍ക്ക് ഇന്ന് തുടക്കമാകുന്നതിനിടെയാണ് വിഎസ്സിനെതിരെ പ്രതിഷേധവുമായി എസ്എന്‍ഡിപി രംഗത്തെത്തുന്നത്.
പുതുശ്ശേരി, മരുതറോഡ്, എലപ്പുള്ളി തുടങ്ങിയ പഞ്ചായത്ത് കണ്‍വെന്‍ഷനുകള്‍ക്കാണ് ഇന്ന് തുടക്കമാകുക. മൂന്നു ദിവസം നീണ്ടു നില്‍ക്കുന്ന പഞ്ചായത്ത് കണ്‍വെന്‍ഷനുകള്‍ വിഎസ് ഉദ്ഘാടനം ചെയ്യും. മണ്ഡലത്തിലെ ഭൂരിഭാഗം കണ്‍വെന്‍ഷനുകളിലും പങ്കെടുക്കുന്ന വിഎസ് അടുത്താഴ്ച മുതല്‍ പരസ്യ പ്രചരണം ആരംഭിക്കും.
