തിരുവനന്തപുരം: ഒരു ദിവസത്തെ സന്ദര്‍ശനത്തിനായി കോണ്‍ഗ്രസ് അധ്യക്ഷ സോണിയ ഗാന്ധി തിരുവനന്തപുരത്ത് എത്തി. 83-ാമത് ശിവഗിരി തീര്‍ഥാടനത്തിന്റെ ഉദ്ഘാടനത്തിനായാണ് സോണിയ കേരളത്തില്‍ എത്തിയിരിക്കുന്നത്.
പ്രത്യേക വിമാനത്തില്‍ തിരുവനന്തപുരം വിമാനത്താവളത്തില്‍ എത്തിയ സോണിയയെ മുഖ്യമന്ത്രി ഉമ്മന്‍ ചാണ്ടി, കെപിസിസി അധ്യക്ഷന്‍ വി.എം.സുധീരന്‍, ആഭ്യന്തരമന്ത്രി രമേശ് ചെന്നിത്തല തുടങ്ങിയ നേതാക്കള്‍ ചേര്‍ന്ന് സ്വീകരിച്ചു. തിരുവനന്തപുരത്തു നിന്നും പ്രത്യേക ഹെലികോപ്ടറില്‍ ശിവഗിരിയിലേയ്ക്ക് പുറപ്പെടുന്ന സോണിയ തീര്‍ഥാടനത്തിന്റെ ഉദ്ഘാടന ചടങ്ങിനു ശേഷം കോട്ടയത്തേയ്ക്ക് പോകും.
ഉച്ചയ്ക്ക് നാട്ടകം ഗസ്റ്റ് ഹൗസില്‍ യുഡിഎഫ് ഘടകകക്ഷി നേതാക്കളുമായി സോണിയ കൂടിക്കാഴ്ച നടത്തും. തുടര്‍ന്ന് പാമ്പാടിയിലെ രാജീവ് ഗാന്ധി ഇന്‍സ്റ്റിറ്റ്യൂട്ട് ഓഫ് ടെക്‌നോളജിയുടെ രജത ജൂബിലി ഉദേഘാടന ചടങ്ങില്‍ പങ്കെടുക്കും. വൈകിട്ട് നാലിന് ഹെലികോപ്ടറില്‍ നെടുമ്പാശേരിയില്‍ എത്തി സോണിയ ഡല്‍ഹിക്ക് മടങ്ങും.
