തിരുവനന്തപുരം:ശ്രീജിത്തിന്റെ കസ്റ്റഡി മരണത്തില്‍ സിബിഐ അന്വേഷണം വേണമെന്ന് മനുഷ്യാവകാശ കമ്മീഷന്‍ ആക്ടിംഗ് ചെയര്‍മാന്‍ പി മോഹനദാസ്. സംഭവത്തില്‍ ഉന്നത ഉദ്യോഗസ്ഥര്‍ ഉള്‍പ്പെട്ടിട്ടുണ്ടെന്നും കുറ്റക്കാരായ പൊലീസുകാര്‍ക്കെതിരെ കൊലക്കുറ്റം ചുമത്തണമെന്നും മോഹനദാസ് പറഞ്ഞു.
ശ്രീജിത്തിനെ വീട്ടില്‍ നിന്ന് കസ്റ്റഡിയിലെടുത്തത് ഉന്നത ഉദ്യോഗസ്ഥന്റെ നേതൃത്വത്തിലുള്ള ടാസ്‌ക് ഫോഴ്‌സില്‍പ്പെട്ട പൊലീസ് ഉദ്യോഗസ്ഥരാണ്. ഇവര്‍ക്ക് നിര്‍ദേശം നല്‍കിയ ഉന്നതോദ്യോഗസ്ഥരും അന്വേഷണ പരിധിയില്‍ വരണമെന്ന് മനുഷ്യാവകാശ കമ്മീഷന്‍ ആക്ടിംഗ് ചെയര്‍മാന്‍ പി മോഹനദാസ് ആവശ്യപ്പെട്ടത്.
ശ്രീജിത്തിനെ കസ്റ്റഡിയിലെടുത്തപ്പോഴും അതിന് ശേഷവും പൊലീസ് സ്വീകരിച്ച നടപടികള്‍ നിയമങ്ങള്‍ കാറ്റില്‍ പറത്തിയാണ്. നിയമസഹായം ലഭ്യമാക്കാതിരുന്നതും ബന്ധുക്കളെ കാണാന്‍ അനുവദിക്കാതിരുന്നതും ഇതിന്റെ തെളിവാണെന്നും സ്റ്റേഷനില്‍ ഇന്ന് നടത്തിയ തെളിവെടുപ്പില്‍ പല രേഖകളും കാണാനായില്ലെന്നും അദ്ദേഹം പറഞ്ഞു.
