ന്യൂഡല്‍ഹി: ഡല്‍ഹി ക്രിക്കറ്റ് ടെസ്റ്റില്‍ ഇന്ത്യന്‍ ക്രിക്കറ്റ് ടീമിന് ഇതിഹാസ നേട്ടം.
ക്രിക്കറ്റ് ചരിത്രത്തില്‍ ഏറ്റവുമധികം ടെസ്റ്റ് പരമ്പരകള്‍ സ്വന്തമാക്കുന്ന ടീമെന്ന റെക്കോര്‍ഡില്‍ റിക്കിപോണ്ടിംഗിന്റെ ഓസ്‌ട്രേലിയന്‍ ടീമിന്റെ നേട്ടത്തിനൊപ്പം കൊഹ്‌ലിയുടെ ഇന്ത്യന്‍ പടയുമെത്തി.
തുടര്‍ച്ചയായി 9 ടെസ്റ്റ് പരമ്പരകള്‍ സ്വന്തമാക്കിയാണ് ഇന്ത്യന്‍ സംഘം ഇതിഹാസം രചിച്ചത്.
രണ്ട് വര്‍ഷങ്ങള്‍ക്ക് മുമ്പ് ശ്രീലങ്കയ്‌ക്കെതിരെ തുടങ്ങിയ പരമ്പര നേട്ടം കൊഹ്‌ലിയും കൂട്ടരും ഒരിക്കല്‍ കൂടി ശ്രീലങ്കയ്‌ക്കെതിരെ സ്വന്തമാക്കുകയായിരുന്നു.
ഇതിനിടയില്‍ ലോകക്രിക്കറ്റിലെ വമ്പന്‍മാരായ ഓസ്‌ട്രേലിയ, ദക്ഷിണാഫ്രിക, ഇംഗ്ലണ്ട്, ന്യൂസിലാന്‍ഡ്, വെസ്റ്റ്ഇന്‍ഡീസ് തുടങ്ങിയ ടീമുകള്‍ക്കെതിരെയെല്ലാം പരമ്പരനേട്ടം സ്വന്തമാക്കാന്‍ ടീം ഇന്ത്യയ്ക്കായി.
അതേസമയം അവിശ്വസനീയ പോരാട്ടത്തിലൂടെ ലങ്കന്‍ പട മൂന്നാം ടെസ്റ്റില്‍ സമനില പിടിച്ചെടുത്തു.
അനായാസ ജയം പ്രതീക്ഷിച്ച് അഞ്ചാം ദിനം കളത്തിലെത്തിയ ഇന്ത്യന്‍ ടീം ശ്രീലങ്കയുടെ അവിശ്വസനീയ പോരാട്ടമികവിനാണ് സാക്ഷ്യം വഹിച്ചത്.
