മലയാള സിനിമ രംഗത്തെ മികവുറ്റ കോസ്റ്റ്യൂം ഡിസൈനറാണ് സ്റ്റെഫി സേവ്യര്‍. സംസ്ഥാന അവാർഡ് ജേതാവ് കൂടിയായ സ്റ്റെഫി ആദ്യമായി സംവിധായികയാകുന്നു എന്ന വാര്‍ത്ത നേരത്തെ പുറത്ത് വന്നിരുന്നു. ഇനിയും പേരിട്ടില്ലാത്ത ചിത്രത്തിന്റെ ചിത്രീകരണം പൂര്‍ത്തിയായി. ഷറഫുദ്ധീൻ, രജിഷാ വിജയൻ എന്നിവരാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത്. സൈജു കുറുപ്പ്, വിജയരാഘവൻ, ബിന്ദു പണിക്കർ, അൽത്താഫ് സലിം, സുനിൽ സുഗത, ബിജു സോപാനം എന്നിവരും ചിത്രത്തില്‍ വേഷമിടുന്നു.
കോട്ടയം ജില്ലയിലെ കുറവിലങ്ങാടിനടുത്തുള്ള വയലായിൽ ആയിരുന്നു ചിത്രത്തിന്റെ ചിത്രീകരണം തുടങ്ങിയത്. സെന്റ് ജോർജ് പള്ളി ഓഡിറ്റോറിയത്തിൽ നടന്ന ലളിതമായ ചടങ്ങോടെ തുടക്കമായ ചിത്രമാണ് ഇത്. ചന്ദ്രു സെല്‍വ രാജയാണ് ചിത്രത്തിന്റെ ഛായാഗ്രാഹണം നിര്‍വഹിക്കുന്നത് ‘മഹേഷ് ഗോപാൽ, ജയ് വിഷ്‍ണു എന്നിവരാണ് ചിത്രത്തിന്റെ തിരക്കഥ എഴുതുന്നത്. ബിത്രീഎം ക്രിയേഷൻസിന്റെ പുതിയ ചിത്രമാണ് ഇത്. ഹിഷാം അബ്‍ദുള്‍ വഹാബ് ആണ് സംഗീത സംവിധായകൻ. അപ്പു ഭട്ടതിരിപ്പാടാണ് ചിത്രത്തിന്റെ എഡിറ്റിംഗ്. നിർമ്മാണ നിർവ്വഹണം – ഷബീർ മലവെട്ടത്ത്.
പത്തനംതിട്ട ജില്ലയിലെ ഒരു യാഥാസ്ഥിതിക നായർ തറവാട്ടിനെ കേന്ദ്രീകരിച്ചാണ് ചിത്രത്തിന്റെ അവതരണം. ഒരു കുടുംബത്തിൽ അരങ്ങേറുന്ന കൊച്ചു കൊച്ചു കാര്യങ്ങൾ തികഞ്ഞ നർമ്മത്തിന്റെ മേമ്പൊടിയോടെ അവതരിപ്പിക്കുകയും ഒപ്പം ചില സന്ദേശങ്ങളും ഈ ചിത്രം നൽകുന്നു എന്നാണ് റിപ്പോര്‍ട്ട്. ജയൻ ക്രയോണാണ് ചിത്രത്തിന്റെ കലാസംവിധാനം നിര്‍വഹിക്കുന്നത്. മേക്കപ്പ് റോണക്സ് സേവ്യർ, കോസ്റ്റ്യൂം ഡിസൈൻ സനൂജ് ഖാൻ, പിആര്‍ഒ വാഴൂർ ജോസ്, ഡിജിറ്റല്‍ മാര്‍ക്കറ്റിങ് ഒബ്സ്‍ക്യൂറ എന്നിവരുമാണ്.
