സൂപ്പര്‍ഹിറ്റ് സംവിധായകന്‍ ഷങ്കറും ദളപതി വിജയും ഒരിക്കല്‍ക്കൂടി ഒരുമിക്കാന്‍ ഒരുങ്ങുന്നുവെന്ന് റിപ്പോര്‍ട്ട്. ചിത്രത്തിന്റെ വണ്‍ലൈന്‍ ഷങ്കര്‍ വിജയ്‌യോട് പറഞ്ഞെന്നും അത് ഇഷ്ടമായ വിജയ് തിരക്കഥ പൂര്‍ത്തിയാക്കാന്‍ ആവശ്യപ്പെട്ടെന്നും ഡിടി നെക്സ്റ്റ് റിപ്പോര്‍ട്ട് ചെയ്യുന്നു.നിലവിലെ കമ്മിറ്റ്‌മെന്റ്‌സിന് ശേഷമാവും ഷങ്കര്‍ ഇതിന്റെ തിരക്കഥാ രചനയിലേക്ക് കടക്കുക. രണ്ട് ബിഗ് ബജറ്റ് ചിത്രങ്ങളാണ് അദ്ദേഹത്തിന് പൂര്‍ത്തിയാക്കാനുള്ളത്. കമല്‍ ഹാസന്റെ ഇന്ത്യന്‍ 2, രാം ചരണ്‍ നായകനാവുന്ന ഗെയിം ചേഞ്ചറും. രാഷ്ട്രീയ പശ്ചാത്തലമുള്ള ചിത്രമായിരിക്കും ഇതെന്നാണ് റിപ്പോര്‍ട്ടുകള്‍.
ഇതിന് മുന്‍പ് ഒരു ചിത്രമാണ് ഷങ്കര്‍- വിജയ് കൂട്ടുകെട്ടില്‍ പുറത്തെത്തിയത്. 2012 ല്‍ പുറത്തെത്തിയ നന്‍പന്‍. സൂപ്പര്‍ഹിറ്റ് ബോളിവുഡ് ചിത്രം 3 ഇഡിയറ്റ്‌സിന്റെ ഒഫിഷ്യല്‍ റീമേക്ക് ആയിരുന്നു ഇത്. തന്റെ മറ്റ് ചിത്രങ്ങളില്‍ നിന്നൊക്കെ വേറിട്ട ഈ ചിത്രത്തില്‍ ബോളിവുഡില്‍ ആമിര്‍ ഖാന്‍ അവതരിപ്പിച്ച കഥാപാത്രത്തെയാണ് വിജയ് അവതരിപ്പിച്ചത്. അതേസമയം ലോകേഷ് കനകരാജിന്റെ സംവിധാനത്തില്‍ ഒരുങ്ങുന്ന ലിയോ ആണ് വിജയ്‌യുടേതായി പുറത്തിറങ്ങാനിരിക്കുന്ന അടുത്ത ചിത്രം.
