കൊച്ചി: സർക്കാരിനും വിചാരണ കോടതി ജഡ്ജിക്കുമെതിരെ ഗുരുതര ആരോപണങ്ങളുമായി ആക്രമിക്കപ്പെട്ട നടി നൽകിയ ഹർജി ഹൈക്കോടതി ഇന്ന് പരിഗണിക്കും. ഇന്നലെ ജസ്റ്റിസ് കൗസർ എടപ്പഗത്തിന്റെ ബഞ്ചിൽ കേസ് ലിസ്റ്റ് ചെയ്തിരുന്നു. എന്നാൽ നടിയുടെ ആവശ്യപ്രകാരം ജഡ്ജി പിൻമാറി.
ഹർജി ഇന്ന് ജസ്റ്റിസ് സിയാദ് റഹ്മാന്റെ ബെഞ്ചിലാവും വരിക. നടിയെ ആക്രമിച്ച കേസിലെ തുടരന്വേഷണം പാതിവഴിയിൽ അവസാനിപ്പിക്കാനും അന്തിമ റിപ്പോർട്ട് സമർപ്പിക്കാനും അന്വേഷണ സംഘത്തിന് മേൽ രാഷ്ട്രീയ ഉന്നതർ സമ്മർദം ചെലുത്തുന്നതായാണ് ഹർജിയിൽ ആരോപിക്കുന്നത്. എറണാകുളം പ്രിൻസിപ്പൽ സെഷൻസ് ജ‍‍ഡ്ജിയായിരുന്ന കൗസർ എടപ്പഗത്തിന്റെ ഓഫീസിൽ നിന്നാണ് നടിയെ ആക്രമിച്ച ദൃശ്യങ്ങൾ ചോർന്നതെന്ന സംശയം നടി പ്രകടിപ്പിച്ചിരുന്നു.
അന്വേഷണ സംഘം ഇവിടുത്തെ ജീവനക്കാരെ ചോദ്യം ചെയ്യാൻ ഒരുങ്ങിയിരുന്നു. ഈ സാഹചര്യത്തിൽ ഹൈക്കോടതിയിൽ താൻ നൽകിയ ഹർജി ജസ്റ്റിസ് കൗസർ എടപ്പഗത്തിന്റെ ബഞ്ചിൽ പരിഗണനയ്ക്കെത്തരുതെന്ന് ആവശ്യപ്പെട്ട് നടി രജ്സറ്റാർക്ക് അപേക്ഷ നൽകി. ഇതോടെയാണ് ജസ്റ്റിസ് കൗസർ എടപ്പഗത്ത് കേസിൽ നിന്നും പിന്മാറിയത്.തുടരന്വേഷണ റിപ്പോർട്ട് മെയ് 30നകം നൽകാനാണ് അന്വേഷണ സംഘത്തിന്റെ ശ്രമം.
