വരാനിരിക്കുന്ന ടോക്കിയോ ഓട്ടോ സലൂൺ 2024 ൽ സുസുക്കി ഒമ്പത് വാഹനങ്ങൾ അവതരിപ്പിക്കുമെന്നാണ് റിപ്പോര്‍ട്ടുകൾ. ഈ വാഹനങ്ങളിലൊന്ന് സ്‌പേഷ്യയുടെ പ്രത്യേക വകഭേദമായിരിക്കും. സുസുക്കി സ്‌പേഷ്യ കിച്ചൺ കൺസെപ്റ്റ് ആണിതെന്നാണ് റിപ്പോര്‍ട്ടുകൾ. മാതാപിതാക്കൾക്കും കുട്ടികൾക്കും ഒരുമിച്ച് യാത്ര ചെയ്യാനും പാചകം ചെയ്യാനും കഴിയുന്ന തരത്തിലാണ് ഈ പ്രത്യേക വേരിയന്റ് രൂപകൽപ്പന ചെയ്‍തിരിക്കുന്നതെന്ന് സുസുക്കി പറയുന്നു.
പാചകം പ്രവർത്തനത്തിന്റെ ഒരു പ്രധാന ഭാഗമായ ക്യാമ്പിംഗ് ആസ്വദിക്കുന്ന കുടുംബങ്ങളെ ഉദ്ദേശിച്ചുള്ളതാണ് ഇത്. പിൻ സീറ്റുകൾക്കും ലഗേജ് കംപാർട്ട്‌മെന്റിനും ഇടയിൽ സ്ഥിതി ചെയ്യുന്ന കിച്ചൻ സ്‌പേസോടുകൂടിയ സ്‌പേഷ്യയെ സുസുക്കി വാഗ്ദാനം ചെയ്തിട്ടുണ്ട്. ഒരു സെറ്റ് പിൻ സീറ്റുകളുള്ള ഒരു യൂട്ടിലിറ്റി വാഹനമാണ് സ്റ്റാൻഡേർഡ് സ്‌പേഷ്യ. റിയർ ആംറെസ്റ്റ്, ലഗേജ് സപ്പോർട്ട്, ലെഗ് സപ്പോർട്ട് എന്നിവയും നിർമ്മാതാവ് വാഗ്ദാനം ചെയ്യുന്നു. പിന്നിലെ സൺഷെയ്‌ഡ്, സീറ്റ് വാമർ, ഹീറ്റർ ഡക്‌റ്റ്, യുവി ഗ്ലാസ്, പവർ സ്ലൈഡിംഗ് റിയർ ഡോർ എന്നിവയുണ്ട്.
സ്‌പാസിയയെ കൂടാതെ, സൂപ്പർ കാരിയുടെ കസ്റ്റം വേരിയന്റായ ‘മൗണ്ടൻ ട്രെയിൽ’ സുസുക്കി പ്രദർശിപ്പിക്കും. എന്നിരുന്നാലും, സ്വിഫ്റ്റ് കൂൾ യെല്ലോ റെവ് കൺസെപ്റ്റ് ആയിരിക്കും പ്രധാന ആകർഷണം. അടിസ്ഥാനപരമായി ഇത് 2024 സ്വിഫ്റ്റ് ആണ്. ഇത് ചില കോസ്മെറ്റിക് അപ്‌ഗ്രേഡുകളുമായി വരുന്നു. ബ്ലാക്ക് റൂഫും ഡെക്കലുകളുമുള്ള കൂൾ യെല്ലോ മെറ്റാലിക് നിറത്തിലാണ് ഈ കൺസെപ്റ്റ് പൂർത്തിയാക്കിയിരിക്കുന്നത്. ‘ഫോർത്ത് ജനറേഷൻ സ്വിഫ്റ്റ്’ എന്ന് പറയുന്ന പുതിയ ഗ്രാഫിക്‌സ് സൈഡിൽ ഉണ്ട്. ഗ്രില്ലിനും ഫോഗ് ലാമ്പ് ഹൗസിംഗിനും സുസുക്കി ഗ്ലോസ് ബ്ലാക്ക് ഉപയോഗിക്കുന്നു, ഫ്രണ്ട് സ്പ്ലിറ്റർ മാറ്റ് ബ്ലാക്ക് ആണ്. ഹെഡ്‌ലാമ്പുകൾക്കും ടെയിൽ ലാമ്പുകൾക്കും സ്മോക്ക്ഡ് ഇഫക്റ്റ് ലഭിക്കുന്നത് പോലെ തോന്നുന്നു.
